ТЖМ-нің экс-басшысы Юрий Ильинге қатысты тексеріс жүргізіледі

Мәжіліс алаңында ішкі істер министрі Марат Ахметжанов құқық қорғау органдары қызметкерлері төтенше жағдайлар жөніндегі экс-министр Юрий Ильинге қатысты тексеру жүргізетінін айтты, - деп хабарлайды Massaget.kz тілшісі.

Журналистер ІІМ басшысынан Ильинге қатысты жеке іс немесе тексеру жүргізіліп жатқанын сұрады.

"Президент бас прокурорға тапсырма берді, оның аясында тексеру жүргізіледі. Өрт дерегі - төтенше жағдай, адамдар қаза болды, сондықтан қылмыстық іс аясында тексеріс болады. Неліктен дер кезінде шара қолданбады? Мүмкін немқұрайдылық, қызметтік міндеттерін орындамау", - деді А.Ахметжанов.

Өрттің ықтимал себептеріне тоқталған ішкі істер министрі әртүрлі нұсқалар зерттеліп жатқанын айтты.

"Өрт қою, немқұрайдылық, найзағай түсу деген нұсқалар бар. Сараптама және іздестіру шаралары жүргізіледі. Тергеуге екі ай уақыт берілді", - деп түсіндірді ІІМ басшысы.

Еске салайық, бұған дейін "Семей орманы" аумағында өрт шыққаны хабарланған еді. Кейінірек Абай облысындағы орман өртінің аумағы 2 мың гектарға жетті. Сондай-ақ, үш ауылдың тұрғындары үйлерін тастап кеткені белгілі болды. Ал тұрғындар өртсөндірушілерді азық-түлікпен қамтамасыз етті. 

"Батырлар арамызда". Желіде өртсөндірушілердің далада ұйықтап жатқан видеосы тарады

Абай облысындағы алапат өрт салдарынан орман шаруашылығының 14 қызметкері іздестірілді. Кейін оның үшеуі қаза тапқаны анықталды. Осы жағдайлардан кейін Семейде орман өртіне байланысты төтенше жағдай режимі енгізілді. Сонымен қатар, екі ауылға қауіп төніп тұрғаны хабарланды.

Мемлекет басшысы Қасым-Жомарт Тоқаев Абай облысындағы өртке байланысты Вьетнамға сапарын кейінге шегерді. Президент Абай облысындағы өртке байланысты Үкіметке шұғыл тапсырма берді. Үкімет басшысы да қарамағындағыларға бірқатар тапсырма берді.

Кейінірек орман өрті 60 мың гектарға жайылғаны белгілі болды. Осыған орай 7 учаскеде өрт сөндіру жұмыстары жүргізілді. Сондай-ақ, өрттен 11 адам өлі табылды.

Абай облысында өрт: қаза тапқандарға қатысты жаңа дерек айтылды

Абай облысындағы өрттен қаза тапқандардың толық тізімі жарияланды. Ал экология және табиғи ресурстар министрі Зүлфия Сүлейменова Абай облысындағы өрт кезінде қаза тапқан орман шаруашылығы қызметкерлерінің суретін жариялады.

Абай облысындағы өртте ерлігі мен жанқиярлығы үшін қаза тапқан 14 адам марапатталды

Абай облысындағы өрт ошақтарының басым бөлігі оқшауланды. Тоқаев Абай облысындағы өрт аумағын тікұшақпен аралап шықты. 

Абай облысындағы өрт: әуеден 486 рет су төгілді

Президент Қасым-Жомарт Тоқаев "Семей орманы" табиғи резерватындағы алапат өрт салдарынан қаза тапқан орман шаруашылығы қызметкерлерінің отбасы мүшелері мен жақын туыстарына көңіл айтты. Мемлекет басшысы өрттен зардап шеккендерге өзі көмек беретінін мәлімдеді. Тұңғыш Президент Нұрсұлтан Назарбаев та Абай облысында өрттен қаза тапқан қызметкерлердің отбасына көңіл айтты. 13 мамырда Үкімет отырысы бір минут үнсіздікпен басталды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!