АҚШ-та #deletefacebook челленджі әлі жалғасып жатыр

Интернет қолданушыларының арасында #deletefacebook (facebook-ті өшір) челленджінің тарауы бұл әлеуметтік желіге айтарлық кері әсерін тигізгені айтпаса да белгілі. Челлендждің жаппай тарауының салдарынан америкалықтардың 26%-ы телефондағы Facebook қосымшаларын өшірген. Бұл туралы Business Insider интернет басылымы хабарлады.

Американың Pew зерттеу орталығы мамыр және маусым айларында америкалық 4500 адамнан Facebook турасында сұрап, қоғамдық сауалнама жүргізген. Зерттеу қорытындысы бойынша, бүгінде бұл желіге белсенді кіретін қолданушылардың қатары сиреп кеткен. Халықтың 42%-ы Facebook-тегі парақшаларына жиі кіруін қойған. Сол сияқты, америкалықтардың 54%-ы жеке өмірі жайлы қосымша ақпараттарды жариялаудан бас тартқан. Өз аккаунтындағы ақпаратты бөгде қолданушының көруіне де тосқауыл қойылып жатыр. Құпиясөзді ауыстыру әрекеттері жиілеп, күмәнді парақшалардан шығып кетіп жатқандардың саны артуда.

#Deletefacebook челленджі 2017 жылдың соңында барлық әлеуметтік желіде тарады. Бұл бастаманы, тіпті, әлемдік өнер, қоғам қайраткерлері қолдады. Әйгілі америкалық миллиардер Илон Масктың өзі Facebook-тегі SpaceX, Tesla парақшаларын өшіргенін хабарлаған едік.