Агуэро "Манчестер Сити" тарихындағы ең үздік сұрмерген атанды

Аргентиналық шабуылшы Серхио Агуэро "Манчестер Сити" командасы тарихындағы ең үздік сұрмерген атанды. Футболшы тарихи голын түнде өткен Чемпиондар лигасы топтық кезеңіндегі "Наполиге" қарсы ойында соқты.

Неапольда өткен ойында ағылшындық команда 4:2 есебімен жеңіске жетті. Серхио Агуэро 69 минутта гол соғып, "Манчестер Сити" клубы тарихындағы ең үздік сұрмерген атанды. Осыған дейін үздіктер қатарын өткен ғасырдың 20-30 жылдары команда сапында ойнаған Эрик Брук есімді футболшы бастап келген еді.

Аргентиналық шабуылшы "Манчестер Сити" жейдесінде жүріп 178 гол соғып үлгерді. Эрик Брук 177 гол соққан. Үздіктер үштігіндегі Томми Джонсонның еншісінде 166 гол бар.

Серхио Агуэро "Манчестер Сити" командасында 2011 жылдан бері ойнап келеді. Екі рет ағылшын премьер-лигасында жеңімпаз атанды. Екі рет Англия лигасы кубогын жеңіп алды.

"Манчестер Сити"  клубы тарихындағы ең үздік сұрмергендер:

1. Серхио Агуэро – 178 гол

2. Эрик Брук – 177 гол

3. Томми Джонсон – 166 гол

4. Колин Белл – 153 гол

5. Джой Хайз – 152 гол

6. Вилли Мередит – 151 гол

7. Фрэнсис Ли – 148 гол

8. Томми Броуэл – 139 гол

9-10. Билли Гилеспий – 132 гол

9-10. Фред Тилсон – 132 гол