Ғажайып Грузия
жеке
блог

Ғажайып Грузия

Ғажайып Грузия

 Баршаңызға сәлем! Сіздерге өзінің ән-биімен ерекшеленетін Кавказ тауларының баурайындағы Гүржістан, яғни Грузия елі туралы айтып бергім келеді. Грузия елінің астанасы Тбилиси, Қара теңіз жағалауындағы Батуми қаласы мен Уреки елдімекеніне барып қайтқан болатынмын. Сапарым сәтті әрі есте қаларлықтай өткен соң, өзім байқаған, өзімнің ойымша қызықты факторларды тізіп берейін.

1. Грузияның халқы қазақ халқы секілді өте қонақжай халық. Біздің «Қонақ келсе, құт келер» сөзімізбен астарлас «Қонақ – құдай берген сый» деген грузин мақалы да бар. Қонақ келгенде олар да кең арқа болып, дастархан жайып, барын береді

 2. Грузияның атақты лезгинка биі мен басқа да халық әндері мен жырлары ЮНЕСКО-ның қорғауында. Лезгинка биіне арнап Тбилисиде ескерткіш де орнатылған.

 

3. Грузия халқы «Біздің өлке әлем бойынша шараптың отаны» деген пікірді ұстанады. Шарап жасауды бұл өлкеде 7000 жыл бұрын қолға алынған. Ал бүгінгі таңда 500-ден астам шараптың түрлері өндіріледі.Сондай-ақ, кез-келген азамат өз үйінде шарап жасайды.

4. Бұл өлке минералды суға бай бұлақтарымен мақтанады. Суы нәрлі әрі емді келетін Грузияда 2400 минералды бұлақтар бар.

5. Грузия халқының ер-азаматтары тілге бай жандар. Қолдарына шарап ұстап, небір аңыз-әңгімелерді арқау етіп, керемет тілектер айта алады. Ал күнделікті өмірде олар көп сөйлей бермейді екен. Сондай-ақ, ер-азаматтар бір-бірін көргенде бет сүйістіріп амандасады.

6. Отандық туризмді дамыту мақсатында Грузия елі «Шарап саяхаты», «Емдік туризм», «Жеміс-жидектер туры» деп әр түрлі туристтік бағдарламаларды ұсынады. Туристтерге жеңіл әрі түсінікті болсын деп туристтік компаниялар грузин, орыс және ағылшын тілінде қызмет көрсете алады.

 

7. Грузия халқы тамақты қолмен жегенін көрсеңіздер, таң қалмаңыздар. Хинкали деп аталатын ұлттық тағамдарын шанышқы мен пышақ ұстап жеп отырған туристтерді көргенде олар күле қалайды. Себебі, бұл асты қолмен жеу керек.

8. Грузия елінің азаматтарына өз үйінде қару-жарақ ұстауға мемлекет тарапынан рұқсат етілген.

9. Грузия халқы да қазақ халқы секілді «Шақырылған жерден қалма» деген сөзді ұстанады. Қонаққа, мерекеге, тойға шақырылған жерде міндетті түрде баруға тырысады. Бармаған жерде мереке иесінің көңіліне дақ түзеді деп есептейді. Үйлену тойға барған кезде бүкіл қонақтар қалыңдыққа алтын сыйлауға міндетті. Сондай-ақ, жаназаға келген әрбір жан өзімен бірге шарап, ет, азық-түлік әкелуі тиіс. Бұл елде бейіт, мазарлар қала көшелерінде, ауыл орталығында орналаса береді.

10. Грузия халқы христиан дінін қабылдаған. Қала мен елдімекендерінен үлкен крест немесе иконаларды көре аласыз. Сондай-ақ, шіркеу маңынан өткен сайын олар бір сәтке тоқтап, иман келтіріп, шоқынады.

 

11. Грузия халқы жол жүру ережесін мүлдем сақтамайды. Көлік жүргізушілері ғана емес, жаяу жүргіншілер де бағдаршамның қызыл түсіне өтіп кете береді. Тар жолда көлік жүргізушілері бір-бірінен озып жүреді. Көлік тізгінінде отырып, ұялы телефонмен сөйлесіп, белдікті тақпай отыра береді.

12. Грузия еліне барам десеңіз, міндетті түрде туристтік жолдама алу шарт емес. Ғаламтордан толық ақпаратты қарап, өзіңіз бара берсеңіз болады. Сонда өзіңізге артық шығынсыз, аз бюджетті демалыс ұйымдастыра аласыз.

13. Грузия елінің шекара қызметкерлері құжаттарыңызды тексеріп болғаннан кейін сізге 1 бөтелке шарап ұсынады. Бұл да қонақжайлықтың бір көрсеткіші.

 Кездескенше)