жеке
блог

Болашақта өзімді қалай елестетемін?

Әр тұлға өзінің болашағы туралы ойлайтыны сөзсіз. Кім боламын, ең бастысы қандай адам боламын дейді.  Көптеген адамдар  өздерін табысты, саналы және беделді адам ретінде елестетеді. Негізі 10 жыл немесе 5 жыл, тіпті 1 жылдың өзі-өте үлкен  кезең, бұл уақытта өте көп өзгерістер болуы мүмкін, тіпті күні ертең біз не боларын білмейміз.

Ал дәл қазір мен болашағым туралы не айта аламын?

 Мен оқуымды аяқтап, мамандығым бойынша жұмыс істейтін боламын, өз шаңырағымды құрамын. Бірақ, ең бастысы-болашақта қайда және кіммен жұмыс істейтінім емес, менің қандай болатыным.  Мен іштей өзгеретініме сенімдімін, бұл өзгерістер тек жақсы жағынан болады деп үміттенемін. Мен бойымдағы көптеген жақсы қасиеттерді дамытқым келеді. Өз қабілеттерімді шыңдап, жаман әдеттерден арыламын.

Менің болашаққа деген жоспарым: жақсы адам болу және мен мақтан тұтарлықтай көптеген жақсы қасиеттерге ие болу. Мен үшін өмірімнің мақсаты - жақсы адам болу, үнемі жетілу. Жақсы және беделді жұмыс мен үшін өмірдегі ең бастысы емес. Менің ойымша, әр адам бірінші кезекте өзін-өзі дамыту, өзін-өзі жетілдіру мақсатына ие болуы керек. Бірақ бұл үшін өзіңізбен көп жұмыс істеу керек.

Кейде біз айналамыздағы өзгерістерді байқамаймыз, назар аудармаймыз, күніміздің өткеніне риза болып қана жүреміз. Ал мен жәй ғана өмір сүргім келмейді, мен өмір сүріп қана қоймай, өмірден өз орнымды тауып, артымнан із қалдырғым келеді. Болашақта мен, көлік жүргізуді үйренген заманауи ана болып, саяхаттаған елдерім туралы әсеріммен бөлісіп,  бірнеше тілді меңгеремін деп үміттенемін. Менің журналистикаға, биге, өнерге деген құштарлығым мені біраз жерге жетелеп, ерекше жолмен жүруге көмектеседі деп ойлаймын. Мен бірнеше жылдан кейін өмірді талдауға болмайтынын, өмірдегі барлық эмоциялар әдемі екендігі туралы есімде сақтаймын деп шын жүректен үміттенемін.

Менің басым, қолым және жүрегім әрқашан жаңа нәрселерді ашуға құштар болады, мен арманымды бөлісуден және оны жүзеге асырудан қорықпаймын. Өмір біз өзіміз жасайтын сәттерден тұратынын әрқашан есімде сақтаймын.

Негізінен барлық адамның болашағы сол адамның өзіне тікелей байланысты. Болашағың туралы ойламай , ештеңе жасамай, тек қазіргі сәтпен және өткенімен өмір сүру дұрыс емес. Сондықтан болашақта бәрі жақсы болуы үшін қазірден әрекет етуіміз қажет: болашақты жоспарлау, өткенді есте сақтау және ең бастысы өзін-өзі жетілдіруге ұмтылу!




Ең қызықты блогтар

Жұлдызды блогтар