Тәуелсіздік  мақтанышымыз!
жеке
блог

Тәуелсіздік мақтанышымыз!

   Біз  тәуелсіз  ел  болып, көк  туымыз  әлем  аренасында  бой  көтергелі  30  жыл. Тәуелсіздік – біз  үшін қан  мен   тердің  арқасында  алынған  үлкен  қамал. Аттандап  жауға да  шаптық, дауылға  да  қарсы  тұрдық, ақырында тәуелсіздік  бізге  бас  иген, тарихы  күреске  толы  бейбіт  ел  болдық. Армандадық, мақсат  еттік, күрестік, қол  жеткіздік...

   1991  жылы  өз  еркіндігінің  ірге  тасын  мығымдап  қалап  бастаған  қазақ, бүгінде  сол  ірге  тасқа  тұрғызған   қабырғаны  одан  ары  биіктетіп, құлатпай, биіктеген  сайын  әр  қатарына  жақсы  естелігін  шегелеп, өз  еркіндігін  сол  қабырға  бетіне  көркем  суреттей  алатын  суретші  елге  айналды. Кең  даласы  төрткүл  дүниемен  шектесіп, әлеммен  шексіз  байланысқа  түсе  бастады. Еркіндік  алған  30  жылдың  ішінде  көптеген үлкенді-кішілі  жоспарларды  орындады, қай  қырымен  болмасын  әлем  көз  тігетіндей  елге айналды. Берілген  мүмкіндіктерді  ұтымды  пайдаланып, мүмкіндігі  шексіз  ел  болды. Әрине, тәуелсіздік  алғаннан  соң  да, барлық  дүниеге  бірден  қол  жеткізіп, үлкен  мүмкіндіктерге  бірден  ие  болмадық. Асықпай, ақырындап  барлығына  қол  жеткіздік. Тәуелсіздік  біздің  мақтанышымыз. Әлбетте, мақтанатындай  дүние. Кей елдермен  салыстырып  қарағанда  біз  даму үстіндеміз, өзімізді  мойындатудамыз. Мені  қуантатыны  біз  тек  өзіміздің  сыртқы  саясатымызбен  ғана  әлемге  танылып  жатқан  жоқпыз, күллі  әлем  біздің  ішкі  байлығымызды, өмірімізді  білуге  ынтық. Біздің   тәуелсіздігіміз  тек  бізге   ғана  емес, жүз   отыздан  астам  өзге  ұлттарға  да  еркіндік сыйлауда. Бұның  өзі  мақтанышпен  айтылатын  дүние.

   Тәуелсіздік  тек ел  мүддесі  үшін  ғана  үлкен  сый  болмады. Адам  құқығына, ойлары  мен  іс  әрекеттеріне  еркіндік  берілді. Мейлі  ол  қандай  жастағы, қандай  нәсілдегі  адам  болмасын  өз  ойын  кез  келген  ортада  еркін қорғай  алатындай  дәрежеге  жетті. Бірақ, кейбір қазақылық  көзқарастарымыз әлі де  өз күшінде. Еркіндікпен  есептеспейтін, кей  дәстүрлеріміз, ырым-тыйымдарымыз, ескіліктен  қалып  қойған, ескі  қазақы  көзқарастарымыз  көп  дүниеден  шектейтіндей. Әрине, өз  дәстүрінсіз, ырымынсыз  қазақты  елестету  де  қиын, тек  кей дәстүрлердің  озығы  бар, тозығы  бар. Жаңашыл  көзқарастағы, тәуелсіз  ел  болғандықтан, кей  ырымдардан  тиылуымыз  қажет  сынды. Ал  керісінше  кей  дәстүрлерімізді  еркін  кеңістігімізде  дамытуды  қолға  алуымыз  өте  маңызды. Себебі, әрбір  еркін, дамыған  ел  өз  салтымен  ерекше. Еркіндігімізді  мойындаған  әлем, ерекшелігімізді  де  назарында  ұстауы  қажет. Бірақ, еркіндігіміз  шексіз  бола  бастаған  сайын, қоғам  үлкен  дертке  шалдығатындай. Бұлай  деуге  негіз  көп. Дәл  қазіргі  таңда  айналаға  көз  салсақ, ескілікті  көз  қарассыз  ақ, кей  адамдар  еркіндік  ұғымын  шамадан  тыс  қолданадыма  деп  те  ойлайсың. Себебі, еститініміз  ессіз,тым еркінсіп   кеткен  адамдардың  іс-әрекетінен  туындаған  талай  жаға  ұстатарлық  жағдайлардың  куәсі  болып  жатырмыз. Сондай  сәтте  ойлайтының, мүмкін  тәуелсіз  ел  болсақ  та, кебір нәрсеге  тәуелденгеніміз  жөн  секілді. Сонда  көтерген  қабырғамыздың  бір  түйір  балшығы  да  шетке  шықпай, түзулігін  сақтайтындай.

   Тәуелсіздік – біздің  мақтанышымыз, күресі  мен  текетіресі  бітпейтін  мына  әлемдегі  үлкен  қаруымыз. Ойымды, Нұрсұлтан  Назарбаевтың  мына  сөзімен  қортындылауды  жөн  көрдім: «Тәуелсіздіктің  тар  жол, тайғақ  кешуінен, беттен  қағар  желінің  есуінен  тайсалмауға  тиіспіз».  

 

                                             

Әл-Фараби атындағы Қазақ Ұлттық Универси                                                                             Журналистика факультеті, "Баспагерлік-редакторлық                                                                       және дизайнерлік өнер кафедрасы", "Баспа ісі"                                                                               мамандығы, 2- курс студенті Айдархан Аружан