Мысыр пирамидаларының салыну мақсаты
жеке
блог

Мысыр пирамидаларының салыну мақсаты

Мысыр пирамидалары – Мысыр жерiнде орналасқан ежелгi пирамидалар кешенi. Гиза қаласындағы пирамидалардың б.з.д. 3000 жылдарда салынғаны, Хеопс, Хефрен және Микерин есімді перғауындардың атымен аталатыны белгілі. Пирамидалар орналасқан Гиза аймағы құнарсыз, шөл дала болып табылады. Ол кезде ол жерде ел қоныстанбағандықтан, перғауындар жоғарырақта, Мемфис, Люксор және Карнак қалаларында тұратын болған. Ғалымдар, пирамидалардың соғылуы үшін 100 000 адамның 660 жыл жұмыс істеуі керек дейді.
Спутниктік фотосуреттерге қарағанда, пирамидалардың жәй қарапайым ғимарат емес екені байқалады. Үлкен пирамидалардың бұрыштары Ніл дельтасын екі бірдей бөлікке бөліп тұр. Патша бөлмесіне жылына 2 рет қана күн түседі. (Туылған күні және таққа отырған күні). Бұдан бөлек, пирамидалар 3-4-5 пропорциясына (пифагор теориясына) сай етіп жасалған. Үлкен пирамида мен жердің центрі арасындағы қашықтық, Солтүстік полюс арасындағы қашықтықпен бірдей. Биіктігін миллиардқа көбейткенде күнге дейінгі ара-қашықтықты береді. Яғни ол кездегі адамдар астрономияны, жағрафияны жақсы білген. Тарихшы Геродоттың айтуы бойынша, құрылыс материалдарын жоғарыға шығару үшін 925 метр ұзындықта, ені 19 метр болатын бір кран тәріздес сырық жасалған. Бұл сырықтың да соғылуы ең аз дегенде 10 жылға созылады. Хеопс пирамидасы ауырлықтары 70 тонна мен 3 тонна арасында болатын 2 000 000нан артық блок тастартан жасалған. Ені 230 метр болатын шаршы негізінде құрылған. Пирамиданың ортасында, жоғарыдан шамамен 100 метр төменде перғауын бөлмесі бар және тек төрт қабырға ғана. Кезінде Наполеон Гизадағы басты үш пирамиданың тас блоктарымен Францияның барлық шекарасын 3 метр биік, 30 см қалың қорғанмен қоршауға жетеді деген қызық есеп шығарған екен. Тарихшы Геродоттың жазбаларында пирамиданың 20 жылда біткені айтылған. Ол үшін, Нілдің суы көтерілген маусымда, күніне 4000 блок тасылуы керек. 60 миллион тонна тастың тасымалдануы үшін 1000 қайық қажет. Қолмен тегістеліп, жылтыратылған 460 000 таспен қапталған.

    Ең әуелі пирамидалардың өте дәлдікпен салынғаны таңғалдырады. Бұлар ұқыпты орналастырылғаны соншалық, тіпті араларына темекінің қағазы да симайды екен. Соншама көп тастардың қандай жолмен өңделіп, қалай жеткізіліп, қалайша қаланғаны да жұмбақ. Геометриялық орналасуы да ғажап: оның төрт жағы дүниенің төрт бұрышына бағытталған, бар-жоғы 8 минуттық ауытқу байқалады. Ал, Хеопске көрші 143,5 метрлік биік Хефрен пирамидасы, келесі 65 метрлік Микерин пирамидасы үшеуі биіктен қарағанда, батысқа қарай дәл өлшеммен шұбырта бағытталып салынған. Хеопс пен Микерин пирамидаларына қатарласа қаз-қатар үш-үш кіші пирамидалар орналасқан. Ол перғауындардың әйелдері мен апа-қарындастарына арналған молалар болған. Олардың да өзара өлшем ұқсастықтары егіз тамшыдай. Хефреннiң тұсына таман салынған адам басты, арыстан денелі 20 метрлік әйгілі алып Сфинкс тұтас жартастан қашалып жасалынған Қарапайым құрал-саймандармен мұншама сұсты дүниелерді қалай салғаны туралы дәлелді болжамдар ғана айтылады.

    Сонымен Хеопс пирамидасы салынғалы бергі 4 мың жыл бойы пирамиданы адам салғаны рас па деген сұрақ кімді де болсын мазалауын қояр емес. Ол туралы аңыз да көп. «Осыншалық алып дүниені адам салуы мүмкін емес» деп күмәнданатындар да кездеседі. Біреулері «жындар салған болуы ықтимал» десе, бәзбіреулері «бұл - жер бетінде болған басқа өркениеттің белгісі» дейді, енді бірі «жоқ, мұндай кереметті бөтен ғаламшардан келгендер салған» деген болжамдарын ұсынады. Неге олай? Себебі, бүгінге дейін және технология дамыған қазіргі заманда да дәл осындай теңдессіз құрылысты адамдар әлі өз қолымен сала алған жоқ. Мысалы, 1989 жылы Париж қаласындағы Лувр мұражайының жанына салынған сәулетші Пэйдің шыны пирамидасының биіктігі 22 метрден аспайды. 1972 жылы АҚШ-тың Сан-Франсиско қаласында пирамидаға еліктеп салынған халықаралық штаб-пәтердің алып құрылысы бар. 48 қабаттан тұратын ғимараттың биіктігі 260 метр болғанмен, көлемі Хеопс пирамидасының жартысына жетпейді. Сондықтан да, Хеопс пирамидасы - адамзат тарихындағы 7 кереметтің бірі. Грек тарихшылары 7 кереметке: Олимпиядадағы Зевстің статуясын, Галикарнастағы мавзолейді, Ирактағы Семирамиданың аспалы бағын, Родос аралындағы 32 метрлік Гелиос алып мүсінін, Александрия маягын, Эфестегі Артемида ғибадатханасын жатқызады. Бірақ, осылардан бүгінге дейін аман жеткені осы Хеопс пирамидасы ғана. Аңыздарға қарамастан оны салғызған иесі мен қалай тұрғызылғаны жөніндегі деректер анықталған.
Пирамиданы салуға Хеопстың ұлы Хафр өзі басшылық етті, ал сәулетшілер, ерекше талантты өнертапқыштар таңдалып отырған.
Хеопста басқа пирамидаларға қарағанда ішкі ауа жолдары мен камералар өте көп. Олардың бәрі фотокамера-роботтар арқылы зерттелсе де, жұмбақ нәрселер әлі де жетерлік. Пирамиданың дәл ортасына патша камерасы орналастырылған. Оның ұзындығы - 10,6 м, ені - 5,3 м, биіктігі - 5,9 м. Патша камерасынан төменіректе ханшайым камерасы да болған. Оған да 2 ауа жолы және жер астына түскен соң екіге айырылатын бөлек дәліз жасалған. Бірақ, оған ханшайымның мәйіті қойылмаған, Фараонның мүсіні сақталған. Бұл да - шешуі жоқ жұмбақтардың бірі. Қазір бұл пирамидалар қалашығы саяхатшылардың сүйікті мекеніне айналып отыр.
Пирамиданың жасырын құпия күш қуатынын түп-төркіні неде? Бұл сұраққа пирамида құрылымын ондаған жылдар бойы зерттеген Карел Дрбал былай деп жауап береді: "Біздің көңіл күйіміз, жұмыс қабілетіміз, денсаулығымыз қандай бейнелі үйде өмір сүріп, уақытымызды өткізетінімізге тікелей байланысты. Текше бейнелі (төртбұрыш) үйлерден гөрі пирамида бейнелес үйлерде өмір сүру тиімді болмақ". Расында да, торға салынған аңдарды пирамидаға көшіріп, бақылау жүргізгенде олардың күш-қуаты көбейіп,көңіл күйі көтеріліп, тәбеттері артқаны аңғарылған. Ал сол торлы дәл сол материалдан жасалған текше бейнелі бөлмеге ауыстырғанда аңдар аяқ асты өзгеріп, тәбеттері жоғалып, көңіл-күйлері төмендеп кеткен. Осының өзі Карел Дрбалдың көп жылғы зерттеулерге негізделген тұжырымын дәлелдеп, дәйектеп тұрғандай. Кім біледі, жоғарылап биіктеген сайын сүйірленіп, үшкірлене беретін пирамида құрылымының өзі таза қуат, өрісті көп мөлшерде жиып алып , тоғыстырып, таратар аккумулятор әрі генератор рөлін атқаруға негізделген болар.
Сонымен, "Мысырдағы пирамидалардың салыну мақсаты не?" Осы сұрақтың жауабын ғалымдар әлі күнге дейін шешімін таба алмауда. Әрине, осындай пирамида салу идеясын ең алдымен өмірге әкелген адамның өз рухы екені талассыз. Адамның рухында мәңгілікке деген құштарлық бар. Мәңгі дүниенің бар екендігінің нышаны осыдан білінеді. Алайда, адамдар мәңгілікті бұ дүниеден іздеген. «Өлместің суы», «Қорқыттың көрі»,...осыдан шыққан. Перғауын секілді жарты әлемді билегендер де жанталасып, мәңгі жоғалып кетпеудің амалын іздеген дей тура, мүмкін біз білмеген, сыры әлі де ашылмаған пирамиданың құпиялары бар болар. Регрессолог Макс Ульянецкийдің жазуынша: Өзге елден келген цивилизация өкілдері пирамида арқылы адамдардан қуат көзін тартып алады екен. Оның айтуынша бөгде ел цивилизациясы телепортация және де адам білмейтін көптеген құбылыстарды жасай алғанымен, оларда жердегі секілді жан энергиясы жоқ.....
Ал сіз қалай ойлайсыз, ол кандай энергия?

    Пирамиданың ашылмаған дүниелері әлі де көп.

Пайдаланылған әдебиеттер:
1. Питер Топкинс. Тайна великой пирамида Хеопса. М.Центрполиграф,2005
2. ҚАЗАҚСТАН ҰЛТТЫҚ ЭНЦИКЛОПЕДИЯСЫ, 6 том
3. "Зерде" ғылыми-көпшілік журналы,1994, 7 саны.
4. Интернет-ресурстар материалдары.

Данат Жанатаев, Әл-Фараби атындағы Қазақ ұлттық университетінің доценті, философия ғылымдарының кандидаты

 Тагаева Айман, Әл-Фараби атындағы Қазақ ұлттық университетінің магистранты