Алматыдағы хостелден өрт шығып, салдарынан 13 адам қаза тапты. Оқиға кезінде қаза тапқандардың бірінің інісі Әнуар Сыдықов ағасы туралы сұхбат берді, - деп хабарлайды Massaget.kz тілшісі.
Оның сөзінше, төтенше жағдай кезінде туған бауыры көз жұмған. Бұл туралы колледжден хабарлаған.
"Туған бауырым өрттен қаза тапты. Колледжден хабарласып, "арты қайырлы болсын, бауырың өртеніп кетті" деді. Жұмыстан сұранып, бірден осы жерге мүрдені тануға келдім. Анамыз екеуміз кірдік. Сол екен. Оның жасы 22-де еді. Нақты қайда жұмыс істейтінін білмеймін, бірақ жұмыс істейтінін айтатын. Алматыға кішкентай кезімізде келдік. Анам, бауырым, мен - бәріміз бөлек-бөлек тұрдық. Арзан болған соң хостелде тұрған болуы керек. Қанша уақыт ол жерде тұрғанын білмеймін. Маған ешқашан хостелде тұратынын айтқан емес. Пәтер жалға алып тұрамын дейтін. Ол студент емес. Колледжге хабарласып, мүрдені тану керек екені туралы айтылған. Содан кейін олар бірден маған хабарласты", - дейді ол.
Марқұмның бауыры оның қандай адам болғанын да айтты.
"Жақсы, мейірімді адам еді. Бірақ жақсы адамдармен байланысқан жоқ. Достары мүлде болмады десе де болады. Бір апта бұрын кездестік. Оған көмек керек болды. Ақшам болмады, сағатымды бердім, соны ломбардқа тапсырды. "Бір ай тұру үшін ақша керек" деді. Сағатты беріп, ломбардқа тапсырып, тұрған", - дейді ол.
Еске салайық, бұған дейін 30 қарашада сағат 5:33-те Алматыдағы Әди Шәріпов көшесінде өрт шыққаны хабарланды. Кейінірек Алматыдағы хостелден шыққан өрт салдарынан үш адам ауруханаға түскені белгілі болды. Оқиғадан кейін бірнеше адам басқа хостелге ауыстырылды. Алмалы ауданы әкімінің орынбасары Руслан Идрисовтің айтуынша, қазіргі таңда 50-52 адам басқа хостелдерге орналастыру жұмыстары жүргізіліп жатыр.
Алматы әкімі Ерболат Досаев хостелдегі өртке қатысты пікір білдіріп, зардап шеккендердің көбісі Қазақстан азаматтары, бір Өзбекстан азаматы, біреуі РФ-ден екенін, қалғанының құжаттары қаралып жатқанын айтты. Қазақстан Республикасының премьер-министрі Әлихан Смайыловтың өкімімен Алматыдағы хостелден шыққан өрттің себептерін анықтау және оның салдарын жою жөніндегі Үкіметтік комиссия құрылды.
Алматы денсаулық сақтау басқармасы өкілдері хостелден шыққан өрттен зардап шеккендердің жағдайы туралы айтты. Алматы қаласы ТЖД осы дерек бойынша ҚР Қылмыстық кодексінің 292-бабына сәйкес қылмыстық істі тіркеді. Алматы Полиция департаменті өкілдері қаза тапқандар кімдер екенін мәлімдеді. Алматы әкімдігі хостелден шыққан өртке қатысты жаңа дерек айтты.
Өзекті жаңалықтарды өз уақытында оқу үшін Facebook парақшамызға жазылыңыз!