Роналду Instagram желісінде Мессиден екі есе артық табысқа кенелген

Португалия ұлттық құрамасы мен Туриннің "Ювентус" клубында ойнайтын Криштиану Роналду 2018 жылы Instagram желісі арқылы мол табысқа кенелген. Табысы жасыл алаңдағы бәсекелесі саналатын Лионель Мессиден екі есе көп, - деп жазады La Gazzetta dello Sport.

Өткен жылы португалдық футболшы Instagram желісіндегі ресми парақшасына 49 жарнама жазбасын жариялаған. Нәтижесінде 44,1 миллион еуро табыс тапқан. Месси болса 36 жарнамалық постынан 21 миллион еуро алған.

Екі футболшы да осы әлеуметтік желі арқылы ең көп табысқа кенелгендердің көшбасшысы. Үшінші орында америкалық сәнбике – Кендалл Дженнер. Оның өткен жылдағы табысы – 14,4 миллион еуро.

Қазіргі таңда Роналдудың ресми парақшасына жазылушылар саны - 186 миллион. Мессидің 133 миллион оқырманы бар.