Украиналық инженер жолаушыларды ұшақ апатынан сақтайтын капсула ойлап тапты (видео)

Ресей жолаушылар ұшағы Мысыр аумағында апатқа ұшырауы көптеген адамға қайғы алып келді. Мұндай апатта жолаушылардың аман қалуын ойластырған украиналық ғалым арнайы қауіпсіздік капсуласын ойлап тауыпты. Украиналық БАҚ өкілдерінің жазуынша, Мысырда болған оқыс жағдайдан кейін инженердің идеясын қолдаушылар саны әлдеқайда артқан.

Владимир Татаренко – ғылым мен техника саласынде жасаған еңбегі үшін Украинаның Мемлекеттік сыйлығымен марапатталған тәжірибелі инженер. Ол әуе тасымалдарын қауіпсіз етудің жолын ұсынып отыр. Ол бұл идеяны осыдан үш жыл бұрын патенттеп алған.

Ғалымның есебі бойынша, ұшақтың ішкі қабаты алып капсула кейпінде салынуы тиіс. Қозғалтқыш істен шығып, жолаушыларға қауіп төнген кезде, капсула ұшақтан бөлініп шығады. Сосын жерге арнайы парашют көмегімен түседі.

Владимир Татаренконың өнертабысы, әзірге, қағаз жүзінде математикалық есептеулер мен инженерлік сызбалардан тұрады. Ал оны материалдық деңгейде жүзеге асыру үшін 1 миллион АҚШ доллары қажет. Дегенмен, ұшақ құрастырушы компаниялар инновациялық идеяны қолдану үшін қаржы бөлуге асықпай отыр.