Онлайн-олжа: жаңа тренд: 8D музыка

Қазір 8D audio жаңа трендке айналып келеді. Оның ерекшелігі музыканың көлемдірек шығуында. Яғни 8D форматқа ауыстырылған музыка адамды айнала дыбысталып жүргендей әсер қалдырады. Бірақ оны тек құлаққаппен тыңдау керек. Өйткені ашық динамик 8D аудиофайлдарының дыбыс толқындарын шашыратып жібереді. Ал 8D құрал-жабдықтарымен жасақталған бөлмеде оның дыбысталуы нағыз кемеліне жетеді екен. 

Құлаққап тағуды ұмытпаңыз

Youtube видеохостингіндегі 8D TUNES каналы алғаш 8 ай бұрын видео жариялапты, қазір каналдың 867 136 тыңдарманы бар, ал барлық видеосы 22 855 740 қаралым жинаған. Instagram парақшасы болса, әзірге 3 278 тыңдарман жинап үлгерген.

Әндердің көбін 8D форматқа ыңғайлап өңдеуге болады екен, бірақ олардың барлығы бірдей 8D эффектіні толық жеткізе алмайтын көрінеді. Сондықтан дыбыс энтузиастары әзірге дыбысы қанық, сапалы туындыларды ғана өңдеуге мәжбүр.