Астана полициясы автобуста төбелескен әйелдерді іздестіріп жатыр

Астана полициясы автобуста төбелескен әйелдерді іздестіріп жатыр, – деп хабарлайды Tengrinews.kz тілшісі қалалық ІІД баспасөз қызметіне сілтеме жасап.

2 қарашада кондуктор мен жолаушы арасында болған төбелес Сотқа дейінгі тергеудің бірыңғай реестрінде ҚР ҚК 293-бабы ("Бұзақылық") бойынша тіркелді.

"Жолаушының кім екені анықталып жатыр", - деп хабарлады Астана ІІД баспасөз хатшысы. Полиция өкілдері кондуктордың түсінік бергенін мәлімдеді. Сот сараптамасы тағайындалды. Тергеу амалдары жүргізіліп жатыр.

Еске сала кетейік, 2 қарашада әлеуметтік желілерде Астана автобусында екі әйелдің төбелескені бейнеленген видео кең талданған еді. Видео авторының айтуынша, әйелдердің бірі автобус кондукторы, ал екіншісі жолаушы. Олардың нақты қандай себеппен жанжалдасқаны әзірше белгісіз. Видеодан екі әйелдің бір-бірінің шашынан тартып, жерге құлағандарын көруге болады. Айта кетейік, куәгерлердің ішінде бір ғана адам оларды ажыратуға тырысты.