Қазақстанда ең ауқымды K-Pop фестиваль өтеді

EXPO-2017 аясында Оңтүстік Кореяның ұлттық апталығына байланысты Астана қаласында ең ауқымды K-Pop фестиваль өтеді,  деп хабарлайды Tengrinews.kz тілшісі.

«EXPO көрмесінің ұлттар апталығына байланысты өткізілетін мәдени шаралардың ішінде ең басты мерекенің бірі – K-Culture Party концерті. Бұл шарада Оңтүстік Корея мен Қазақстанның атақты топтары өнер көрсетеді. Концерт 18 шілдеде Сарыарқа велотрегінде өтеді», – деді Корея павильонының комиссары Пеон Йон Соп.

Сонымен қатар бұл концерт екі елдің мәдени алмасу үлгісінде жасалғандықтан билет тегін таратылатынын атап өтті. «Концертті неғұрлым көп көрермен тамашалау үшін біз Корея павильонының кәріс мәдениеті аймағында тегін билеттер таратамыз. Билет әр күні белгілі мөлшерде таратылады»,– деді Пеон Йон Соп. Концертте әлемге әрі Қазақстанға танымал HIGHLIGHT, B1A4 және AOA секілді жұлдызды топтар өнер көрсетеді.

«Қазақстанның атынан Ninety One және Black Dial топтары шығады. Өткен жылдың қыркүйегінде алғашқы К-Pop концертімен қатар, Feel Korea шарасында Ninety One тобы Кореяның бұқаралық ақпарат құралдарының назарынан тыс қалмады. Бұл мәдени шарамен қатар, екі елдің жұлдыздары топ жаратын K-Crew концертіне де Ninety One өз үлесін қоспақ»,– дейді Пеон Йон Соп.

Корея Республикасының Қазақстандағы елшісі Ким Дэ-сик өз кезегінде EXPO көрмесіндегі бұл шараның бір аптаға созылатынын айтты. «Кәріс ұлттық күні 19 шілде болғанымен, 18-21 шілде аралығында түрлі шаралар орын алмақ. Өзге мемлекеттер 1 күн атап өтсе, Корея бұл дәстүрді апта бойы жалғастырмақ. Бұл Корея апталығы болады. Қазақстан мен Кореяның арасындағы стратегиялық, экономикалық серіктестіктің басты дәлелі»,– деп өз пікірін білдірді елші Ким Дэ-сик.

19 шілде күні  EXPO аумағында Кореяның ұлттық күні көрмесі өтеді. Көрермендерді сан бояулы мәдени шаралар мен аумақты шеру күтеді. Дәл осы күні Астана қаласында Қазақстан-Корея энергетикалық форумы өтпекші. Қатысушылар екі ел арасында энергетикалық өндіріс саласының болашағы туралы талқылайды.

21 шілде күні қазақстандықтарды тағы бір мәдени шара күтіп тұр: опера және балет театрында кәріс әртістерінің дәстүрлі музыкалық қойылымы көрерменге ұсынылады.

«Еліміздің үкіметі өткізгелі отырған шаралар екі елдің технологиясы мен мәдениетіне оң әсерін тигізіп қана қоймай, Қазақстан мен Кореяның  күшті серіктеске айналатынана сенім артады», – деп қорытындалады Пеон Йон Соп.