Тілі өлген ел – тірі өлген ел (тіл туралы мақал-мәтелдер)

Халық тәуелсіздігінің ең басты белгісі - оның ана тілі, ұлттық мәдениеті. Өзінің ана тілі, ұлттық мәдениеті жоқ ел өз алдына мемлекет болып өмір сүре алмайды. Дүниедегі барлық халық тәуелсіздікке ұлттық қадір-қасиетін, мәдениетін, ана тілін сақтап қалу үшін ұмтылады. Сондықтан, кез-келген мемлекет өзінің аумақтық салт-дәстүрін, ана тілін ерекше қорғайды.

Ана тілін дамыту, қорғау дегеніміз – өз ана тілінде таза сөйлеу және оны жақсы біліп, туған анадай сүю. Ана тілінің күші мен құдіретін туған халқымыз әуелден-ақ бағдарлап, сөз өнерін бар өнердің басы деп санаған. Мысалы: "Өнер алды – қызыл тіл", "Тіл тас жарады, тас жармаса бас жарады", "Тоқсан ауыз сөздің, тобықтай түйіні бар" дегені халқымыздың орынды сөзге қандай мән бергенін көрсетеді. Бүгінгі мерекеге орай халқымыздың тіл туралы мақал-мәтелдерін ұсынамыз. 

***

Ат жүйрігі асқа,

Тіл жүйрігі басқа.

***

Тіл буынсыз, ой түпсіз.

***

Шешеннің тілі,

Шебердің бізі.

***

Тіл қылыштан да өткір.

***

Тіземнен сүріндірсең, сүріндір,

Тілімнен сүріндірме.

***

Адам көңілінен азады,

Тілінен жазады.

***

Қотыр қолдан жұғады,

Пәле тілден жұғады.

***

Ашуың келсе қолың тарт,

Айтпас жерде тілің тарт.

***

Тілдің майын тамызып,

Сөздің балын ағызып,

Қас шешендер сөз айтар.

***

Аяққа кісен салуға болар,

Тілге кісен салынбас.

***

Ұлт қасиеті – тілінде,

Құс қасиеті – қанатында.

***

Тілдің анасы – халық.