SmartWallit Inc. деп аталатын америкалық стартап «ақылды» әмиян жасап шықпақшы екен. Құрастырушылар бұл идеяны жүзеге асыру үшін әлеуметтік желілер арқылы 1000 АҚШ доллары көлемінде қаржы жеткілікті екенін айтса да, жаңа құрылғыны жасап шығуға 37 мың АҚШ доллары көлемінде ақша жиналып қойыпты.
SmartWallit Pro құрастырушылары адамдардың соңғы кезде жеке заттарын көп ұмытатындығын байқап, осы мәселенің шешімін табуға кіріскен. Үйден ұзап кетіп, кейін ғана ұялы телефоныңыз немесе әмияныңызды үйде қалдырып кеткен жағдайларыңыз болған шығар?
Гаджеттің идеясы қарапайым: пластикалық карта іспеттес құрылғы (қалыңдығы 4,2 мм) әмиянға салынады. Құрылғы ішіндегі чип смартфоныңызбен Bluetooth 4.0 LE арқылы байланысады. Оны қосу, істен шығару немесе баптаулар смартфондарға (iOS, Android 4.3 және тағы да басқа нұсқалары) арнайы жасалған қосымшалар арқылы мүмкін болады.
Егер сіз әмияныңызды үйде я жұмыста қалдырып кетсеңіз, ұялы телефоныңыз шырылдап қоя береді. Смартфоныңыз әмияныңызды біреу тонап кетсе де дауыс шығарады. Арнайы қосымшаның дауысы көше жағдайында да 10 метрлік радиуста естіліп тұрады. Ал егер сіз әмияныңызды алып, смартфоныңызды ұмытып кетсеңіз, тиісінше әмияныңыздағы карта дәл сондай дабыл даусын шығара бастайды.
SmartWallit Pro гаджеті бес түрлі түспен сатылады. Қазіргі таңда да Kickstarter қорына қаржылай көмектессеңіз, мұндай құрылғыны бар болғаны 25 долларға, ал түрлі-түсті нұсқасын 35-39 доллар көлемінде сатып ала аласыз.
Қорға ақша жиналып болған соң «ақылды» әмиян құрылғысының бағасы 60 доллар болады екен.
Дайындаған: Ардақ Құлтай
Сурет: hi-tech.mail.ru