Сәкен Бибосынов пен Зәкір Сафиуллиннің бүгінгі шығатын қарсыласы жайлы не айтуға болады?

Бүгін, 3 тамыз күні, Токио Олимпиадасының шаршы алаңыда қос боксшымыз бақ сынамақ. 52 килодағы Сәкен Бибосынов пен 63 килодағы Зәкір Сафиуллин.

Сәкен Бибосыновтың қарсыласы – испан боксшысы Габриэль Эскобар. Кездесу астана уақытымен 14:48-де өтпек.

Бұрын Мэнни Пакьяоны нокаутқа жіберген, қазіргі төреші, экс боксшы Серікжан Ешмағамбетовтің айтуынша, испандық боксшы өте мықты.

"Оппозиция өте қуатты. Бәсте қола медаль тұрғандықтан қарсылас барын салып, аянбайтыны хақ. Бірінші раундтан-ақ алға ұмтылады. Сондықтан уақыт жоқ. Сәкен Бибосынов та рингке шыға салысымен барын салуы тиіс", - дейді төреші.

Ал Зәкір Сафиуллин жекпе-жексіз ширек финалға өтті. Моральды-психологиялық ауыртпалық түспеді. Яғни, отандасымыз артық соққы, жарақат алған жоқ. Сондықтан шаршы алаңға сергек шықпақ.

Отандасымыздың ширек финалдағы қарсыласы – австралиялық Гарри Гарсайд. Кездесу астана уақытымен 15:35-те.

"Австралияда жақсы боксшылар бар. Кейбірі жоғары жетістіктерге жетіп жүр. Сондықтан боксшы ел ме әлде жоқ па – босаңсуға болмайды. Жеңу үшін бәріне бару керек", - дейді Серікжан Ешмағамбетов.

Төрешінің айтуынша, Олимпиададан бәрін күтуге болады. Жүлде алады деп үміттенген боксшылар шетінен жеңіліп қалды. Ал Бибосынов пен Сафиуллинді ширек финалға жетеді деп ешкім ойламаған.

Қос боксшымыздың жекпе-жегін Qazaqstan арнасының тікелей эфирінен тамашалаңыз.