“Күмәнді мәмілелер жасалған“: Ақтөбе футбол клубы тексеріліп жатыр

Ақтөбе футбол клубында қаржы жымқырылған, - деп хабарлайды Massaget.kz тілшісі.

Облыс прокуратурасы Ақтөбе футбол клубын тексерген. 250 млн теңгеге қаржылық заңбұзушылықтар анықталған.

"Соның ішінде ойыншылардың трансферлері және әуе тасымалдау бойынша күмәнді мәміле жасалған. Сондай-ақ, ойыншылардың тамақтануына бөлінген қаражатты клуб қызметкерлері жеке қажеттіліктеріне жұмсаған", - деп жазылған хабарламада.

Тексеріс қорытындысы бойынша облыс прокуратурасы мына баптармен соталды тергеуді бастады:

• Қылмыстық кодекстің 189-бабының 4-бөлігінің 2) тармағы (аса ірі мөлшерде сеніп тапсырылған бөтен мүлікті жымқыру);
• 361-бабының 4-бөлігінің 1) тармағы (лауазымдық өкілеттіктерді теріс пайдалану);
• 190-бабының 4-бөлігінің 2) тармағы (алаяқтық) бойынша 3 соталды тергеп-тексеру басталды.

"Қылмыстық істер тергеп-тексеру үшін Сыбайлас жемқорлыққа қарсы қызметке жолданды. Істердің тергелуі облыс прокуратурасының бақылауында", - деп жазылған хабарламада.

Еске салайық, бұған дейін Қазақстан футболында қаржы талан-таражға түскені хабарланды. Бас прокуратура ҚФФ және бірқатар футбол клубын тексергеннен кейін 3 млрд теңге көлемінде заңбұзушылық анықталғанын мәлімдеді.

Федерацияның бұрынғы басшыларына қарсы қылмыстық іс қозғалып, Қаржылық мониторинг агенттігіне жолданғаны айтылды.

Instagram парақшамызға жазылып, ең қызықты ақпараттарды бірінші болып оқыңыз!