"Барыстың" америкалық жаңа ойыншысы қанша жалақы алатыны белгілі болды

"Барыс" хоккей клубының жаңа ойыншысы Райли Барбер қанша жалақы алатыны белгілі болды, - деп хабарлайды Vesti.kz. 

"Спорт-Экспресс" басылымы Құрлықтық хоккей лигасындағы (ҚХЛ) ойыншылар жалақысының жаңарған рейтингін жариялады. Ондағы ақпарат бойынша елордалық команданың америкалық легионері 1 жылда 55 миллион рубль табысқа кенеледі. Мұны теңгемен есептейтін болсақ, 259 миллионды құрайды. Сонда айына 21,5 миллион теңгедей. 

Айта кетейік, "Барыс" америкалық форвардпен келісімге келгені жайлы жуырда ғана хабарлаған болатын. Біржақты келісім 2024 жылдың 30 сәуіріне дейін есептелген. Барбер Ұлттық хоккей лигасында (NHL) 16 ойын өткізген.