Роналду "Реалға" оралуы мүмкін. Футболшыға араб жерінде не ұнамай жүр?  

Танымал футболшы Криштиану Роналду Сауд Арабиясындағы мансабын аяқтап, Мадридтің "Реалына" қайта оралуы мүмкін. El Nacional басылымы ақпараты бойынша, футболшы араб жерінде көптеген қиындықты басынан өткеруде екен.

Роналду Сауд Арабиясына бейімделе алмауда. Мұсылман мемлекетінің кей заңдары футболшы мен отбасы мүшелерінің кей қылықтарына қарама-қайшы келеді. Одан кейін ойыншыға тіл үйреніп, пікір алмасуда да қиындықтар көп. Егер араб командасынан ертерек қайтудың жолын тапса, футболшыны "Реал" президенті Флорентино Перес құшақ жая қарсы алуға әзір. Бірақ Роналду келісімшартты қайтпек?

Футболшының араб жеріндегі алғашқы айы тамаша өтті. Тіпті жанкүйерлер оның "Әль-Наср" командасына ауысқанына сене де қойған жоқ. Кейіннен баспасөз беттерінде әйелі Джорджина Родригестің жергілікті заң ережелеріне бағынбай, ашық киінгені жайлы ақпар тарады. Бұл мұсылман мемлекетіндегі ережені сақтамағаны үшін айыппұл салынуы керек болған. Сауд Арабиясында 2019 жылдан бері қоғамдық орындарда жабық киіну жайлы заң бар. Алайда бұл дау басылып, айыппұл төлеген жоқ. Бірақ Роналдудың әйелі өзінің образын паш етіп, ара-тұра сән әлеміндегі стилін сақтағысы келетіні жасырын емес.

Наурыз айының басында Роналду "Әль-Батен" командасымен өткен ойыннан кейін жанкүйерлер қысымына қызуқанды жауап беріп, ерсі қылық жасады. Бұл да БАҚ назарынан тыс қалмады. Ал сәуір айының ортасында "Әль-Фейха" командасымен болған ойында қарсыластарына қатты сөйлеп, ойынның шырқын бұзды деп айыпталды.

Сәуір айында "Әль-Наср" командасының бас жаттықтырушысы Руди Гарсия қызметінен босатылды. Оған Роналдудың тікелей қатысы бар деп айтылды. Себебі француз маманы жұмысына ойыншының көңілі толмаған деседі. Алайда португалдық әлеуметтік желісінде жазба жариялап, бас жаттықтырушымен жылы қоштасты.

"Әль-Хилал" командасына қарсы өткен ойыннан кейін Роналду тағы да сын құрығына ілікті. Бұл жолы кездесуден кейін "Месси, Месси" деп айқайлаған жанкүйерлер тобына қарап анайы қылық көрсеткен. Бұл үшін араб адвокаты Нуф бин Ахмед ойыншыны сотқа беру керек деп мәлімдеді.

Араға бірер күн сала "Әль-Наср" Сауд Арабиясы кубогы жолындағы ойында "Әль-Вахда" командасынан ұтылды. Бірінші таймнан кейін Криштиану мен команда жаттықтырушылары сөзге келіп қалған. Қарсылас команда ойыншылары да танымал футболшының алаңдағы әрекетіне (командаластарына айқайлаған) таңданыстарын білдірді.

Батыстық басылымдар кейінгі уақытта Роналду әйелімен ажырасқалы жатыр деп те жиі жаза бастады. Оған себеп – Родригестің сауда орындарына көп барып, қыруар қаржы жарататыны жайлы еді. Алайда ойыншы бұл алып-қашпа ақпаратқа жауап ретінде әлеуметтік желісінде әйелімен "Махаббат үшін" деп жазба жариялады.

Роналду Сауд Арабиясындағы бес ай ішінде бірнеше рет жағымсыз жағдайларға тап болды. Алайда әлемде ең көп жалақы алатын ойыншы ретінде танытқан "Әль-Наср" командасымен келісімшартты ерте аяқтауы да екіталай. Әлде "Реалдың" ұсынысы футболшыны қызықтырар ма екен? Бірақ қандай қызметке келеді? Футболшы ретінде, әлде El Nacional жазғандай клуб амбассадоры бола ма?

Чемпионға арналған пәтер!