Кілемдегі дақты қалай кетіруге болады?

Кейде асығыс-үсігіс бір нәрсе жасаймын деп қолыңыздағы майды немесе басқа бір нәрсені төгіп алып, кілемді бүлдіріп аласыз. Ондай оқиғаға тап болсаңыз, мына қағиданы ескеруіңіз керек. Әлгі төгіп алған затыңыз кілемге дақ болып сіңіп қалмай тұрған кезде бірден шүберек алып сүртіп алыңыз.

1. Кофе, какао, шай төгілсе — 1 ас қасық глицеринді 1 литр мұздай сумен араластырып жуыңыз.

2. Сыра, шарап, ликер төгілген жағдайда кір жуатын ұнтақты жылы сумен араластырыңыз. Содан соң сол ерітіндіге шүберек малып, кілеміңіздегі дақты сүртіңіз. Болғаннан кейін сірке су қосылған жылы сумен (1 шай қасық сірке су + 0,5 литр су) шайып алыңыз.

3. Аяқ киімге арналған крем төгіліп қалса, оның үстіне бірнеше тамшы сүт тамызыңыз. Сонда тез жібиді. Кейін сүртіп ала қоясыз.

4. Шүберектің орнына тіс щеткасын да қолдануға болады. Бірақ онымен абайлап сүрту керек.

Кілемдеріңіздің ұзақ өмір сүргенін қаласаңыз, мына бір ескетпелерді естен шығармаңыз:

— Кілемдер ыстық суды ұнатпайды;

— Өте қатты щеткалар кілеміңізді құртады;

— Дақты бірден жоюға тырысыңыз. Егер ұзақ тұрып қалса, кетіру қиынға соғады және кілеміңіз бүлінеді.