Тағы бір сала мамандарының жалақысы өсті
![Тағы бір сала мамандарының жалақысы өсті](/userdata/news/news_77430/image_l.jpg)
Жол жұмысшыларының жалақысы 30 пайызға артты, - деп хабарлайды Massaget.kz тілшісі "ҚазАвтоЖолдың" баспасөз қызметіне сілтеме жасап.
Ведомство мәліметінше, еңбекақысы артқан қызметкерлердің қатарына республикалық маңыздағы тасжолдар желісін тәулік бойы күтіп-ұстаумен айналысатын негізгі өндірістік персонал қызметкерлері мен қосалқы өндіріс қызметкерлері жатады.
"ҚазАвтоЖол" өкілдері қыс мезгілінің басынан бері жол қызметтері күшейтілген жұмыс режиміне ауыстырылғанын атап өтті.
"Жол жұмысшылары күндіз-түні қысқы күтіп-ұстау жұмыстарын атқарып, жолда қиын жағдайға тап болған республикалық трассаларды пайдаланушыларға көмек көрсету жұмыстарын жалғастырып жатыр", - делінген хабарламада.
Ведомство мәліметінше, қаңтарда республикалық маңыздағы автожолдар көктайғаққа қарсы 17 мың куб метр құм-тұз қоспасымен өңделген.
Еске салайық, бұған дейін Ауыл шаруашылығы министрлігі өкілдері биыл ветеринария мамандарының жалақысы 35-50 пайызға өсетінін айтқан болатын.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
С. Сатыбалдина