Монша, сауна ерлерге зиян ба? Отандық уролог жауабы
![Монша, сауна ерлерге зиян ба? Отандық уролог жауабы](/userdata/news/news_82830/image_l.jpg)
Ыстық ванна, монша мен сауна ерлердің денсаулығына кері әсер етуі мүмкін бе? Жалпы ыстық температураның ер ұрығына зиян екені жиі айтылады. Осы сияқты маңызды сұрақтарға уролог-андролог Тұрар Құрманбеков жауап берді.
Оның айтуынша, ыстық су немесе ыстық моншадағы температура ер ұрығына зиян. Балалы болуды жоспарлап жүрген ерлерге ыстық суға түсуге кеңес берілмейді.
"Жігіттер монша-саунаға құмар келеді. Отбасын құрайын деп жүрген немесе үйленіп балалы болуды жоспарлап жүрген ерлерге моншаға жиі баруға кеңес берілмейді. Себебі ұрық ер жұмыртқасында өндіріледі. Оның температурасы дене температурасынан 1-1,5 градус төмен болады. Ал сіз моншаға барған кезде 50-60 градус ыстықтың үстінде отырасыз. Ондай жоғары температураны ер жұмыртқасы сүймейді, себебі ыстықтан сперматозоидтар өліп қалады немесе сапасы төмендейді", - дейді уролог.
уролог-андролог Тұрар Құрманбеков
Бұған дейін ер адамдарға автокөліктердегі жылытылатын орындықтардың зиян екенін жазған болатынбыз. Қазақстандық уролог та көліктегі ыстық орындықтың ер ұрығына кері әсер ететінін айтады.
"Тек монша-сауна емес, жігіттер көліктегі ыстық орындықтардан да абай болғаны дұрыс. Әрине, бәріміз ыстық жерде отырғанды қалаймыз, бірақ оның да өз мөлшері бар. Орындықты тым ысытып отыра беруге болмайды", - дейді ол.
Сондықтан ұзақ сапарларда бұл функцияны өшіру керек - сапарды бастамас бұрын көліктегі орындықты жылытқан дұрыс.
Айта кетейік, қазақстандық уролог Тұрар Құрманбеков ерлерде инфекция бар екенін қалай білуге болатынын айтқан болатын.
Т. Раушанұлы