Маңғыстауда электр энергиясы тапшы: тұрғындар ток пайдалану үшін кезек күтуге мәжбүр
![Маңғыстауда электр энергиясы тапшы: тұрғындар ток пайдалану үшін кезек күтуге мәжбүр](/userdata/news/news_88865/image_l.jpg)
Маңғыстау облысында жалғыз энергокомбинат өңірді электр энергиясымен қамтамасыз етуді 50 пайызға қысқартты, - деп хабарлайды Massaget.kz тілшісі.
Кәсіпорында энергоблоктардың бірінде жөндеу жұмыстары жүргізіліп жатыр. 11 тамызда тағы бір энергоблок істен шығып, апат жағдайында өшірілді. Салдарынан Жаңаөзен қаласы мен оған жақын орналасқан ауылдар, 4 бірдей ауданның елді мекендері жарықсыз қалды. Ал Маңғыстау ауданының тұрғындары кейінгі үш күнде 7 сағат бойы электр қуаты болмағанына шағымданды. Мұнайлы ауданы Маңғыстау ауылында жарық 10 сағатқа өшкен.
Бұған дейін 545 мегаватт ток өндіріп келген МАЭК қазір небәрі 245 мегаватт электр энергия беріп тұр. Апаттың салдарын жою үшін арнайы құрылған штаб өкілдері жарықты үнемдеуден басқа амал жоғын айтады.
Сондықтан облыста бүгіннен бастап жарықты "тиімді" өшіру процесі іске қосылды. Барлық елді мекен мен қалаларда электр энергиясы кестемен өшіріліп жатыр. Мамандар бұл МАЭК өндірісіне салмақты азайтып, жаппай жарықсыз қалудан сақтайтынын жеткізді.
"Осындай қадамға баруға мәжбүрміз. Шектеуді біз барлық елді мекенге қарастырып жатырмыз. Тұрғындарға 1 күн бұрын ескертіледі. Шалғай ауылдар да кестеге енгізіледі. Жарық 3 сағаттан 5 сағатқа дейін өшіріледі деп отырмыз. Мен аймақ тұрғындарынан электр энергияны үнемді пайдалану үшін түсіністікпен қарауды сұрар едім. Біздің жоспарымыз бойынша МАЭК аптаның соңында 3-блокты іске қосуды жоспарлап отыр. Егер толықтай режимге шықса, барлық шектеу жойылады", - дейді Маңғыстау облысы әкімінің бірінші орынбасары Жұмабай Қарағаев.
Қазір облыс аумағындағы мұнай компаниялардың барлығына да электр энергия шектеумен тек түнгі мезгілде беріліп жатыр. Аймақ билігі стратегиялық нысанның жағдайы мүшкіл екенін мойындады. Қосымша генерациялаудың мүмкіндіктері жоқ. 3 жылу электр орталығының екеуі апат жағдайында тұр. Жұмабай Қарағаевтың айтуынша, энергоблоктарды жөндеу жұмыстары басталған. Мамандар күні-түні жұмыс істеп, оларды қысқа мерзімде іске қосуға күш салып жатыр.
Энергокомбинат өкілдерінің айтуынша, кәсіпорындағы энергия блоктарын күрделі жөндеу жұмыстары әр 4 жыл сайын жүргізіледі. Келесі күрделі жөндеу 2024 жылға жоспарланған болатын.
"Авария болған энергонысанды жөндеу жұмыстары өз қаражатымыз есебінен жүргізіліп жатыр. Мамандар мен қажет материалдар жеткілікті. Жалпы үшінші энергоблок әр 4 жыл сайын күрделі жөндеуден өтіп тұрады. Яғни, кестеге сәйкес 2024 жылы жасалады. Бұған дейінгі жөндеуге 1 миллиард 200 миллион теңге жұмсалды. Қазір нарық бағасы өзгерді. Соған орай сметалық есептеулер жалғасып жатыр", - дейді энергокомбинат бас директорының бірінші орынбасары Мұрат Иғалиев.
Мамандардың айтуынша, электр энергияны шектеу шарасы осы аптаның соңына дейін жалғасады. Бұған қоса, Ақтауда барлық шағынауданда ауызсудың қысымы төмендейді.
Айта кетейік, Маңғыстау атом энергетикалық комбинаты 1968 жылы құрылған. Кәсіпорын өнеркәсіп пен өңір тұрғындары үшін электр энергиясын, жылу энергиясын және әртүрлі мақсаттағы суды өндіреді. Бүгінде комбинаттың қондырғылары 80 пайызға тозып тұр. Кәсіпорын басшылығы қондырғы, құрылғыларды жұмысшылардың күшімен жөндеу арқылы қолдану мерзімін ұзартып келеді. Жуырда энергокомбинатты жаңғырту жұмыстарына жергілікті бюджеттен 2,6 милилард теңге, ал ел қазынасынан 4,9 миллиард теңге бөлінді.
Еске салайық, бұған дейін Маңғыстау облысында бірқатар елді мекен жарықсыз қалатыны хабарланған еді.
Сая Мәжитқызы
Қызықты жаңалықтар мен видеоларды көру үшін TikTok арнамызға жазылыңыз!
Massaget.kz