Қазақстанда маска тағу режимі енгізіліп жатыр

Қазақстанда денсаулық сақтау ұйымдарында маска режимі енгізіліп жатыр, - деп хабарлайды Massaget.kz тілшісі.

Қазақстанның бас мемлекеттік санитарлық дәрігері Айжан Есмағамбетова "Ауа тамшылары арқылы таралатын жұқпалы аурулардың таралуын болдырмау бойынша профилактикалық шараларды күшейту туралы" қаулыға қол қойды. Құжатқа сәйкес денсаулық сақтау ұйымдарында маска тағу режимі енгізіледі. 

Айта кетейік, 8 ақпанда Мәжілісте коронавирусқа байланысты маска тағып келу міндеттелген болатын.

ҚР Президенті іс басқармасы медициналық орталығының бас санитар дәрігері осындай қаулы шығарған. 7 ақпаннан бастап Парламент Мәжілісі ғимаратының аумағында коронавирустық инфекцияға қатысты қолайсыз эпидемиологиялық жағдайға байланысты міндетті түрде бетперде кию режимі және басқа да алдын алу шаралары енгізілген. Жиналыстар мен басқа да бұқаралық іс-шаралар онлайн форматқа ауыстырылады немесе маска режимі мен санитарлық нормаларды қатаң сақтай отырып өткізіледі. 

Қаулы бойынша, Санитариялық-эпидемиологиялық бақылау комитетінің облыстардың, Алматы, Астана, Шымкент қалаларының денсаулық сақтау басқармаларының, аумақтық департаменттерінің басшылары:

• медициналық ұйымдарда персоналдың және келушілердің медициналық маскаларды пайдалануын, антисептиктердің болуын;
• халық арасында COVID-19 коронавирус инфекциясының, тұмаудың және ЖРВИ профилактика шаралары туралы ақпараттық-түсіндіру жұмысын жүргізуді қамтамасыз етсін.

Облыстардың, Алматы, Астана, Шымкент қалаларының жергілікті атқарушы органдарына, Орталық мемлекеттік органдарға, меншік нысанына қарамастан жеке және заңды тұлғаларға:

• халық көп жиналатын жерлерде (әуежайлар, теміржол вокзалдары, автовокзалдар, базарлар, сауда-ойын-сауық орталықтары, сауда үйлері, театрлар, кинотеатрлар, ХҚКО-ы, банктер және т.б.), көліктің барлық түрлерінде (қоғамдық көлік, әуе, темір жол көлігі) медициналық немесе матадан тігілген маскаларды пайдалануға ұсыным берілсін.

Еске салайық, бұған дейін Мәжіліс төрағасы Ерлан Қошанов коронавирус жұқтырып алғаны белгілі болған еді. Сонымен қатар, Президенттің кеңесшісі Қанат Бозымбаев коронавирус жұқтырып алды. Ақпаратты Ақорданың баспасөз қызметі растады. 

Өзекті жаңалықтарды өз уақытында оқу үшін Facebook парақшамызға жазылыңыз!