Димаш Маңғыстау туризмінің амбассадоры болмақ
![Димаш Маңғыстау туризмінің амбассадоры болмақ](/userdata/news/news_114313/image_l.jpg)
Әлемге әйгілі әнші Димаш Құдайберген Маңғыстау туризмінің амбассадоры болмақ, - деп хабарлайды Massaget.kz тілшісі Маңғыстау облысының баспасөз қызметіне сілтеме жасап.
Димаш Құдайберген Маңғыстаудың туристік әлеуетін насихаттауға үлес қосады. Маңғыстау облысының әкімі Нұрдәулет Қилыбай өңірге жұмыс сапарымен келген Халық әртісі Димаш Құдайбергенмен кездесіп, облыстың туризм әлеуеті жайында әңгімелесті.
Өңір әкімі әншіні 2025 жылы Ақтау қаласында өтетін Түркі әлеміне ортақ мерейлі шараға қатысуға шақырды.
"Димаш, қасиетті Маңғыстау жерінде сені көргенімізге өте қуаныштымыз. Сенің бұл сапарың - облысымыздағы туризмді дамытуға зор серпін береді деп ойлаймын. Мемлекет басшысы Қасым-Жомарт Кемелұлы Тоқаев Маңғыстаудың туризм саласындағы әлеуетінің жоғары екенін айтып, дамытуды тапсырған болатын. Бүгінде біз бұл салаға тың серпін беру үшін инфрақұрылым мәселесін кешенді түрде шешіп, туристер үшін қызмет сапасын жақсарту бағытында жұмыстанып жатырмыз. Баку және Дубай қалаларының үлгісімен Ақтау қаласының бас жоспарын қайта қарау мәселесін қолға алдық. Туристерді тарту мақсатында "Жылы жағажай" аумағында бірқатар ірі жоба жасалып жатыр. Бұйырса, Ақтауды ірі курорттық орталыққа айналдыру жоспарымыз бар", - деді Нұрдаулет Қилыбай.
Димаш Құдайберген қазақ туризмінің амбассадоры ретінде Маңғыстаудың тарихи-мәдени жерлерін аралап шықты. Әнші киелі өңірдің руханияты, мәдениеті мен туризмін көрсететін деңгейі бөлек туынды әзірлеуді жоспарлап отыр.
"Бозжыраға жақындай бергеннен бастап, керемет әсерге бөлендік. Ертегі әлеміне тап болғандай күй кештік. Сөзбен айтып жеткізу мүмкін емес. Туризм саласын дамыту бағытында алған істеріңізге сәттілік тілеймін. Демалыс орындарын дайындау, ішкі, сыртқы туристерді тарту оңай жұмыс емес. Бізде ел мүддесі үшін, мәдениетімізді дамыту бағытында жұмыс істесек одан басқа арман жоқ. Осы елдің баласы болғандықтан барынша қолдауға дайынбыз", - деді Димаш Құдайберген.
Еске салайық, бұған дейін Маңғыстау облысының әкімі Нұрдәулет Қилыбай өңірдегі мәселелер жөнінде редакцияға эксклюзив сұхбат берді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова