Жеке тұлғалардың банкроттығы бойынша соттан тыс рәсім арқылы берілген өтініш саны кейінгі жағдай бойынша 20 мыңнан асты. Алайда кейбір жағдайда өтініш кері қайтарылуы мүмкін, - деп хабарлайды Massaget.kz тілшісі Қаржы министрлігінің баспасөз қызметіне сілтеме жасап.
Ведомство мәліметінше, алдын ала жүргізілген тексеру кейбір азаматтардың мына себептеріне байланысты банкроттықты қолдана алмайтынын көрсеткен:
- 12 ай ішінде қарыз ішінара өтелгені;
- борышкердің немесе зайыбының мүлкі болуы;
- банкпен не МҚҰ реттеу рәсімін жүргізуі туралы құжаттың болмауы;
- дара кәсіпкер ретінде тіркелгені;
- атаулы әлеуметтік көмекті 6 айда аз мерзімде алуы.
"Ол азаматтардың телефонына 1414 қызметі арқылы соттан тыс банкроттық рәсімін қолданудан бас тарту туралы хабарлама жіберіледі", - делінген ведомство хабарламасында.
Қазақстандықтар мұндай хабарлама алған болса, соттан тыс банкроттыққа қойылған өлшемдерге сәйкес келсе, 3 айдан кейін қайта өтінішпен жүгіне алады.
Еске салайық, бұған дейін Қазақстанда банкроттыққа өтініш қабылдаудың алғашқы күні 2,5 мыңнан аса азамат өтініш бергені хабарланған болатын.
Сондай-ақ, Қазақстанда 1,1 миллионнан аса адам банкроттық туралы заң көмегімен қарызынан құтыла алатыны хабарланды. Бұл туралы қаржы вице-министрі Ержан Біржанов айтқан болатын.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!