Сиырдың түсі мен түгіне байланысты атаулар

Халқымыз үшін сиыр түлегінің орны ерекше. Сауса – сүт, сойса – ет. Әсіресе, сүт үшін сиырды қатты құрметтейді.

ҚАРА СИЫР – сыртқы түгі бірыңғай қара болып  келген сиыр.

ҚАРА ҚОҢЫР СИЫР – жүні аса қара болмай келген сиыр.

САРЫ АЛА СИЫР – ақ түктері бар жерлерінен сарылау түктері бар жерлері көбіректеу боп келген сиыр.

АЛА СИЫР – сыртқы түк-түстері біркелкі келмей, ақ-қоңыр, сарғылт түктері бар жерлері аралас келген немесе сырт жүні тегіс қоңыр боп, арқа жүні ала келген сиыр.

КӨК СИЫР – сиырдың сырт жүні шымқай көк немесе бурыл боп келгені.

Көк сиыр бұзау туғанда,

Қамап қойдық қораға (Халық ауыз әдебиеті). 

АҚ СИЫР – сырт жүндері біркелкі ақ боз келген сиыр.

ҚЫЗЫЛ СИЫР – сиырдың сырт жүндері бірыңғай қызыл келгені.

ҚАРА ҚАСҚА СИЫР – маңдай жүні тұмсығына дейін ақ болып, қалған дене түктері қара келген сиыр.

ҚЫЗЫЛҚАСҚА СИЫР – сыртқы жүндері қызыл болып, маңдай жүндері тұмысығына шейін ақ болып келген сиыр.

ТАРҒЫЛ СИЫР – сиырдың негізгі сырт түктері сарғыш болып, оның үстіне жолақ-жолақ , бүртік-бүртік боп қара қоңыраулы түк жайылғаны.

Сиыр алсаң танып ал,

Танымасаң тарғыл ал (Халық мақалы). 

ҚАРАШҰБАР СИЫР – сырт түктері бірдей болмай, әр жері ұсақ, ойдым-ойдым боп келген түк-терінің қарасы көп сиыр.

АЛА БЕЛСИЫР – сиырдың сырт түгі бірдей келмей, бел тұсының жүні шымқай ақ болып, қалған жері бір түспен келгені.