Айбек Оралбай жасөспірімдер арасында Олимпиада чемпионы атанды

Айбек Оралбай жасөспірімдер арасында Олимпиада чемпионы атанды
Фото: ҚР ҰОК (olympic.kz)

Қазақстандық боксшы Айбек Оралбай Аргентина елінің астанасы Буэнос-Айресте өтіп жатқан жасөспірімдер арасындағы жазғы Олимпиада ойындарында жеңімпаз атанды.

91 кг-ға дейінгі салмақта жұдырықтасатын отандасымыз финалда алжирлік Мұхаммед Әмин Хасидті жеңді. Барлық төрешілер 30:27 есебімен қазақстандық боксшы жеңіске жеткенін хабарлады. Нәтижесінде бокстан ұлттық құрама қоржынына алғашқы алтын медальды салды.

Жасөспірімдер арасындағы Олимпиада ойындарының финалына үш қазақстандық боксшы шыққан болатын. Өкінішке қарай, 91 кг-нан жоғары салмақта Дамир Тойбай финалда Алексей Дроновқа жол беріп, күміс жүлдегер атанды. Төрешілер 4:1 (29:28, 30:27, 30:27, 28:29, 30:27) есебімен ресейлік боксшы жеңіске жеткені туралы шешім шығарды.

Екі боксшы 2018 жылғы әлем чемпионатының финалында кездескен. Алексей Дамирді екі рет нокдаунға түсіріп, жеңімпаз атанып кеткен еді. Қазақстандық боксшы бұл жолы есесін қайтара алмады.

Қыздар арасында Надежда Рябец (69-75 кг) қола жүлдеге қол жеткізді. Үшінші орын үшін өткен кездесуде ол алжирлік Ичрак Чаибті жеңді.

Олимпиада алтынына таласатын тағы бір боксшымыз бар. 64 кг-ға дейінгі салмақта Талғат Шайкен бүгін түнде өтетін финалда ресейлік Илья Поповпен қолғап түйістіреді.

Жасөспірімдер арасындағы ІІІ жазғы Олимпиада ойындары ертең аяқталады. Қазіргі таңда Қазақстан құрамасының қоржынында 4 алтын 2 күміс 2 қола медаль бар. Осыған дейінгі жарыстармен салыстырғанда, бұл - рекордтық көрсеткіш.

Ө. Сансызбай