«Қара киімділер III» фильмі қазақ тілінде сөйлейді

2012 жылы жарыққа шығатын фильмдердің бірі - «Қара киімділер III». Бұл фильм жер бетіндегі өзге ғаламшар тұрғындарының қызметін бақылап, реттейтін құпия ұйымның қызметкерлері жайлы шытырман оқиғаның жалғасы. Он жыл бұрын жарыққа шыққан екінші фильм үздіктердің қатарынан көрініп, басты кейіпкерлерді сомдаған Уилл Смит пен Томми Ли Джонс көрермендердің көзайымына айналды.

Комедия жанрында түсірілген фильмнің жалғасы мамыр айында жарыққа шығады. Sony Pictures компаниясының «Men in Black ІІІ» фильмінің үшінші бөлімі көгілдір экрандардан қазақ тілінде де көрсетіледі. 2012 жылдың 2 сәуірінен бастап, «Болашақ» Қауымдастығы, «Самұрық-Қазына» әл-ауқат қоры, MARWIN компаниясы атақты фильмді Cinema Tone Production студиясында қазақ тіліне дубляждау жұмыстарына кірісті. «Қара киімділер III» фильмі қазақ және орыс тілдерінде көрсетілетін болады.

АҚШ, Ұлыбритания, Ресей және Қазақстан елдерінің мамандарының қатысуымен жасалған халықаралық жоба Қазақстанда шетел фильмдерінің дубляждануының дамуына үлес қосатыны сөзсіз.   

«Қара киімділер III» - кинотеатрларда көрсетілгеннен кейін, Blu-Ray және DVD дисктерінде таратылатын қазақ тіліне дубляжданған Sony Pictures студиясының алғашқы фильмі. Кейіпкерлердің айтар ойы дәл әрі түсінікті жеткізілуі үшін фильм ағылшын тілінен қазақ тіліне тікелей аударылған. Диалогтарды бейімдеу жұмысына Linguaserve компаниясының мамандары атсалысты.

Бас кейіпкерлерді қазақ тілінде сөйлету үшін наурыз айында дауыс сынақтары өткізілді. Іріктеу кезеңіне келген талапкерлерді Sony Pictures компаниясының Қазақстанға арнайы келген қызметкерлері тексерген болатын. Жылдам сөйлейтін Уилл Смитті дыбыстайтын әртісті табу қиынға соққанымен, төрешілер Азамат Қанапияевті лайықты деп тапты. Қазақ тіліндегі дубляж жұмыстарының режиссері - Әйгерім Оңалбек. Дубляж жұмыстары аяқталған бойда, дыбысты әлемдік стандарттарға сай монтаждау үшін дайын материал Лондон қаласындағы Shepperton студиясына жіберіледі.

«Қара киімділер III» фильмінің жалғасында да құпия қызметкерлер өз жұмыстарына аса жауапкершілікпен қарайтын болады. Агент Джей басқа әлемнің соққысына төтеп бере алатын ешқандай галактикалық қорғаныс қалқанының жоқ екендігін біледі. 1969 жылы қаза тапқан Агент Кей көзі тірісінде оны жасап үлгермеді. Сол себептен Агент Джей Жер мен өзінің серіктесін құтқару үшін уақыт кеңістігіне саяхат жасауға бел буады. Шытырман оқиғаға бай фильм достық, батылдық, адалдық секілді мәңгілік құндылықтарды насихаттайды.

Суреттер: 4ladi.ru, chitay.net