Ғаламдық жылыну: Ақпан енді суық ай емес

Биылғы ақпан бұрынғы ақпаннан өзгеше. Боранын алып, ақырап келетін ақпанның биылғы қаһары бұрынғыдай емес, жылынып барады.

Климатологтардың айтуынша, биылғы ақпан бұрынғы ақпандарға қарағанда әлдеқайда жылы. Бұл да ғаламдық жылынудың бір көрінісі, деп хабарлайды Climate Change Service сайты.

Мамандардың сөзіне сенсек, ақпанда тіркелген Еуропа құрлығы, Сібір мен Орталық Азия, Батыс Антарктида аймағындағы температура, жылдағыдай емес, жылы. Орташа температурадан жоғары.

Еуропада мұндай жылы қыс болған емес. 2019 жылдың желтоқсаны мен 2020 жылдың ақпан айындағы температура 2015-2016 жылы болған қыстан 1,4 Цельций градус жылы.

Ал Антарктидада биыл ең жылы температура тіркеліп отыр. Жаңа рекордтың «жылымығы» 20,75 Цельций градусқа тең. 9 ақпан күні Бразилия ғалымдары өлшеген температура бәрінен асып түсті. Сеймур аралындағы термометр 20,75 °С градусты көрсетіп, тарихта тұңғыш рет Антарктидадағы жоғары температураны анықтады. Осыған ұқсас температура 1982 жылы Синьи аралында да тіркелген көрінеді. Ол кезде температура 19,8 градусқа жеткен еді. Ал Сеймурдағы температура одан 1 градусқа жоғары.

Одан бөлек, климотологтардың халықаралық тобы 2019 жылды Әлемдік мұхит суы ысыған ең жылы жыл деп атады. Орташа есеппен мұхит 1981-2010 жылдармен салыстырғанда биыл 0,075 градусқа дейін жылыған.

Бұған қарап ғалымдар Жер шары тез «жылынып» бара жатыр деген қорытындыға келді. Ал мұның соңы ғаламдық апатқа әкелуі мүмкін.