Қазақстанның ең бай азаматы туралы не білеcіз?

Банк, металл өнідірісі, БАҚ, телекоммуникация, қонақ үй, фаст-фуд салаларында өз бизнесін жүргізетін Болат Өтемұратов биыл да Қазақстандағы Forbes журналының рейтингінде көш бастаған. «Верный Капитал» инвестициялық компанияға басшылық ететін миллиардер еншісінде 2,6 миллиард АҚШ доллары бар. Сонымен өз еңбек жолын ЖОО-да ұстаз болып бастаған Болат Жамитұлының жетістікке жету құпиясы неде екен?

Жоғары білімге ие болғаннан кейін Болат «Нархозда» (қазіргі Т.Рысқұлов атындағы ҚазЭУ) ұстаз болып еңбек еткен. Кейіннен Алматы қаласының сауда инспекторы қызметін атқарып, бірнеше жоғары саяси лауазымда отырады. Айта кетсек, арнайы тапсырмалар бойынша елші, Қазақстанның Швейцариядағы елшісі, БҰҰ-ның Қазақстандағы тұрақты өкілі, сыртқы саясат пен экономика салаларындағы Президент кеңесшісі қызметтерінде болады.

Сарапшылардың айтуынша, Болат Өтемұратов өзінің кәсіптік қызметін 1995 жылы бастаған. Ол Алматыда қаржы-сауда банкін құрады. Аталған банктің сол кездегі негізгі серіктесі белгілі бизнесмен Нұрлан Смағұлов (Astana Group: «Астана моторс», MEGA сауда орталықтар желісі, «Зерновая индустрия») болған.

Болаттың инвестициялық компаниясы 2005 жылы  «Казцинк» АҚ (1999 жылы америкалық бизнесмен Марк Рич құрған) сатып алады. Кейіннен «Glencore International AG» атауымен қайта құрылып, 2007 жылы Болат ұтымды бағамен италиялық Uni Credit Group компаниясына сатып жібереді. Дағдарыстың боларын алдын ала пайымдап, инвестициялық қорын дұрыс бағыттай білген Болат Өтемұратов жоғарыдағы сауда келісімінен кейін Қазақстан миллиардерлері қатарына кіреді.

2009 жылы Өтемұратов «Kassa Nova Банкі», «Nova Лизинг» АҚ сынды бірқатар қаржы қызметін ұсынатын компанияларын ашады. Ал Тимур Исатаев есімді бизнес серіктесімен бірген «ForteBank» АҚ ұйымдастырады. 2014 жылы «Альянс Банк» пен «ТемiрБанк» акцияларын толығымен иемденіп, «ForteBank» құрамына енгізеді.

2013 жылы «Верный капитал» инвестициялық компаниясы қайта «Казцинктің» акционеріне айналады. Сол жылы Ақмола және Қостанай облыстарында алтын өңдеумен айналысатын «Орион Минералс»  компаниясын сатып алады.

Қазақ миллиардері бизнесін тек инвестициялық банк саласында ғана емес, сонымен қатар, фаст-фуд желілерінде де бастайды. Еліміздегі «Burger King» брендімен ашылған фаст-фуд ресторандары Болат алған франшизамен жұмыс істеп келеді.

Бүгінде Болат Өтемұратов басшылық ететін «Верный капитал» инвестициялық компаниясы «31 арна» медиахолдингі, «Мегаполис» газеті, informburo.kz интернет-порталы және Мәскеу мен Вена қалаларындағы Ritz-Carlton қонақ үйлеріне иелік етеді. Сонымен қатар, негізгі акционері Болат болған Astana Property Management компаниясы бас қалада Talan Towers экожобасын жүзеге асырып жатыр. Одан бөлек, тәжірибелі қаржы маманы VimpelCom Ltd компаниясымен біріге Қазақстан мен Қырғызстандағы Beeline операторлық қызметін басқарады.

Болат Өтемұратов жанұясы туралы көп ақпарат белгілі емес. Жұбайы Байшуақова Омар (Ажар) Абжәмиқызы Асфендияров атындағы ҚазҰМУ тәмамдаған. Үлкен ұлы Алидар Болатұлы Бейжіңдегі Тіл мен Мәдениет университеті мен Лондондағы экономика мектебінде білім алған. Экономист-саясаткер мамандығын иемденіп, «Казақтелеком» АҚ вице-президенті қызметін атқарады. 2012 жылға дейін  «Васильковский ГОК» АҚ мен «Altyntau Resources» АҚ басқарады. Бүгінде «Green Apple» (киноөндіріс, медиа) инвестициялық компаниясына басшылық етеді.

Болат Өтемұратовтың кіші ұлы Әнуар Болатұлы болашағы бар зерттеулерді қолдайтын Alassio Capital қорын басқарады. Сонымен қатар, QSR компаниясының (Қазақстандағы «Burger King» франшизасының иемденушісі) бас директоры лауазымында қызмет етеді. Сондай-ақ, Әнуар – Қазақстандағы ең үздік фоторепортаждар топтамасын ұсынатын Vox Populi сайтының құрылтайшысы.  

2007 жылдан бері Болат Өтемұратов Қазақстандағы теннис федерациясының президенті, «Нұр Отан» ХДП саяси кеңесінің мүшесі. Сонымен қатар, Болат құрған «Асыл Мирас» қайырымдылық қоры еліміздегі велоспорт пен денсаулық сақтау саласында салынатын нысандарға қолдау білдіреді. Одан бөлек, ҰОС ардагерлеріне де қолдау көрсетіп келеді.