Денсаулық сақтау министрлігі Денсаулық сақтауды дамыту республикалық орталығының бас директоры Қанат Төсекбаев Қазақстандағы дәрігерлердің орташа жалақысы 2025 жылы қанша болатынын Орталық Коммуникациялар қызметіндегі онлайн брифингінде мәлімдеді.
"2018 жылдан 2020 жылға дейін мейірбикелердің жалақысы айтарлықтай өсті, 2018 жылы олардың орташа жалақысы 90 843 теңге болса, қазір 161 281 теңге. Ал дәрігерлердің орташа жалақысы – 258 708 теңге. Мемлекеттік бағдарламаға сәйкес, 2025 жылы дәрігердің бір ставкаға шаққандағы орташа жалақысы кем дегенде 550 000 теңге болады", - дейді Төсекбаев.
Ол сондай-ақ жаңа "Халық денсаулығы және денсаулық сақтау жүйесі туралы" Кодексте қарастырылған медициналық және фармацевтикалық қызметкерлерге берілетін кепілдіктердің тізімін келтірді:
- заңнамада белгіленген тәртіппен қызметкерге өзінің еңбек міндеттерін, оның ішінде қажет медициналық мақсаттағы бұйымдармен қамтамасыз ету үшін тиісті жағдайлар жасау;
- осы мақсаттар үшін заңнамада көзделген жұмыс беруші немесе бюджеттік қаражат есебінен біліктілікті арттыру немесе кәсіби біліктілігін өзгерту;
- біліктілік деңгейіне сәйкес келетін сыйақы және еңбек уәждемесі;
- медициналық қызметкер тарапынан немқұрайдылық немесе немқұрайлылық болмаған кезде науқастың өмірі мен денсаулығына келтірілген зиян үшін кәсіби жауапкершілікті сақтандыру.