Сені күту, сағыну, сабылысу,
Сені күту, жалығу, жанып-ысу,
Сені күту, ойлардың арпалысы,
Сені күту, асығу, алып-ұшу.
Сені күту, арқансыз құрықталу,
Сені күту, бар әлем ұмыт қалу,
Сені күту, Құдай-ау жер айналмай,
Бір секунд орнында тұрып қалу.
Сені күту, қиялдың қарыштауы,
Сені күту, арманның алыстауы,
Пешенеме жазылған күні бұрын,
Сені күту тағдырдың табыстауы.
Сені күту, сезімнің селдіреуі,
Сені күту, жүректің елжіреуі,
Сені күту, үміттің соңғы демі,
Сені күту, жоқ, күттірме енді мені!