"Балалары "Неге мектептен қайтпайды?" деп сұрайды". Алматыда автобус қағып өлтірген ерлі-зайыпты жерленді

Алматыда автобустың астында ажал құшқан ерлі-зайыптыны туыстары соңғы сапарға шығарып салды. Мектепте қазақ тілі мен әдебиетінен сабақ берген марқұмдардың жұмыстан шығып, енді ғана үйіне бет алған кезі екен. Қара жамылған отбасы енді кінәлілер қатаң жазасын алсын деп отыр, - деп хабарлайды Massaget.kz тілшісі КТК телеарнасына сілтеме жасап.

Марқұм Талап Қасымов пен жұбайы Гүлжахан Ырсымбаевадан жақындары қапыда айырылып қалғанына әлі сенбейді. Артында төрт баласы қалған. Екеуі әлі кәмілет жасына да толмапты.

"Үнемі екеуі бірге жүретін еді, сол күні де екеуі ойында ештеңе жоқ, балалары үйде күтіп отырғанын біледі, асығып келе жатқан ғой. Жолда көлік тоқтатып тұрды. Тура қосақтасып екеуі. Балалары түсінбейді әлі, олар біз келгенімізге қонақ деп, жүгіріп ойнап жүр, ертең мына адамның бәрі кеткеннен соң, не деп жауап береміз? Мамасын сұраса, папасын сұраса, не деп айтамыз?", - дейді туысы Гүлнәр Тұрсынбекова.

Ерлі-зайыпты оқуға бірге түсіп, бірге аяқтаған. Жұмысқа да бірге кіріпті. Екеуі қазақ тілі мен әдебиет пәнінің мұғалімі. Сол күні мектептен шығып үйге қарай беттеген. Жол жиегіне тұрып, қала сыртына жүретін көлікті күткен. Сөйтіп ойламаған жерден автобустың астына түсіп мерт болды.

"Қатты жылдамдықпен келді" деді ғой, қашқан адамдарды көрдім. Қашып құтылғандар бар. Құтыла алмай қалған ғой біздің балалар. Полиция қызметкерлері куәлігін алған да, тыныш отыра берген. ЖСН, басқасы бар, қазір дамыған кез ғой, бірден түнде хабарламай ма?!", - дейді туысы Абдулла Құрбанов.

Балаларының ең үлкені – 23, екіншісі – 18 жаста. Үшіншісі – 9-сынып оқушысы, ал кенжесінің жасы бесте. Олар тергеудің әділ жүріп, күдіктінің қатаң жазаға тартылуын талап етіп отыр.

"Артында балалары қалды ғой. Кішкентай баласының өзі 5-6 жаста. Ол күнде мамасын сұрап отыр. "Неге мектептен қайтпайды" дейді. "Мамам қашан келеді?" деп отыр. Барынша өзінің жазасын алсын. Ол қылмыс қой барып тұрған! Бір адамды емес, бірнеше адамды басып өткен. Келіп, тіпті кешірім сұрамаған адамдарға не деп айтамыз? Автобус паркінен де келмеді ғой, ешкім", - деді туысы Сүйінбай Оңғарбеков.

Қара жамылған отбасы автобус паркінен өтемақы төлеуді де талап етеді. Бірақ ол ұзаққа созылатын сыңайлы. Автопарктегілер бүгін бізге де жауап берген жоқ.

Еске салайық, жол апаты өткен аптада Райымбек даңғылының бойында болған. №47 бағыттағы қоғамдық көлік жолдың жиегіндегі бір топ адамды қағып өтіп, үш адам көз жұмып, төртеуі ауруханаға түскен. Апатқа жүргізуші мен жолаушы арасындаға дау себеп болған. Жолаушы рөлде отырған әйелді ұрған. Соққыдан тізгіндегі әйел есінен танып, автобус жылдамдығын азайтпаған күйі жол жиегіндегілерді жайпап өткен. Қайғылы оқиға қатысты тергеу жүріп жатыр. Күдікті жолаушы екі айға қамауға алынған.

Instagram парақшамызға жазылып, ең қызықты ақпараттарды бірінші болып оқыңыз!