Депутат Әлия Назарбаеваға қатысты мәлімдемесін түсіндірді

Мәжіліс депутаты Ерлан Саиров "ӨКМ Операторының" соңғы бенефициары Әлия Назарбаева болғаны туралы бұған дейін айтқан мәлімдемесіне пікір білдірді, - деп хабарлайды Massaget.kz тілшісі.

Мұндай мәлімдеменің алғышарттарына тоқталған Саиров депутаттарға және Amanat партиясы жанындағы Сыбайлас жемқорлыққа қарсы іс-қимыл кеңесіне сотталушылардан арыз-шағымдар, сондай-ақ, кейбір конституциялық қағидаттардың сақталмауы туралы халықтан өтініштер түскенін айтты.

"Конституцияның 14-бабында ҚР әрбір азаматы сот пен заң алдында тең екені айтылған. Тергеу шаралары жүргізілген кезде, сот процесі жүріп жатқан кезде кез келген мемлекеттік қызметші дәл осы қағиданы басшылыққа алуы керек. Бүгінде бұл принциптердің кей жерде жұмыс істемейтінін көріп отырмыз. Сондықтан, бұған Бас прокуратураның назарын аудардық", - деп түсіндірді депутат Tengrinews.kz тілшісіне.
 

Ерлан Саировтың айтуынша, ол қазір Бас прокуратураға жазбаша сауал жолдап, қадағалаушы органның жауабын күтіп отыр.

"Мен белгілі бір құқықтық мәдениетті қалыптастыру керек деп есептеймін. Құқық қорғау органдарының нақты бір адамға қоятын сұрақтары болса, ол өзінің кінәсіздігін көпшілік алдында дәлелдеу керек. Егер мұндай принцип болмаса, бізде заңдылық, әділдік болмайды. Сондықтан, әртүрлі жолдармен, әртүрлі арналар арқылы Қазақстанда жаңа құқықтық философия қалыптасатындай принципке жетуге ұмтыламыз. Бұл конституциялық принциптерге қатысты мәселе. Конституциялық қағидаттар барлық жерде және әр кезде қолданылуға тиіс", - деді мәжілісмен.

БАҚ таратқан мұндай ашық мәлімдемеден кейін ескерту, тіпті қорқыту болды ма деген сұраққа депутат былай деп жауап берді.

"Жаңа Қазақстан жайдан-жай болма салмайды, солай емес пе? Біз қазір белгілі бір құқықтық принциптерді жасап, белгілі бір прецеденттерді қалыптастыруымыз керек. Егер жаңа жақсы құқықтық прецеденттер болмаса, халықтың сенімі құнсызданады. Сондықтан, бұған бәріміз атсалысуымыз керек. Әрқайсы құқықтық тұрғыдан Жаңа Қазақстанның әділ қоғам ретінде орнығуын қамтамасыз етуге ұмтылуы керек", - деді ол. 

Еске салайық, бұған дейін депутат Ерлан Саиров Әлия Назарбаеваға қатысты күтпеген мәлімдеме жасаған еді. 

Тағы да оқи отырыңыздар: Дененің жүрген жолы дегеніміз не?

Өзекті жаңалықтарды өз уақытында оқу үшін Facebook парақшамызға жазылыңыз!