Атырауда алаяқтар өздерін әкімдік қызметкері ретінде таныстырып, зейнеткерден жарты миллион теңге алдап алған, - деп хабарлайды Massaget.kz тілшісі atpress.kz-ке сілтеме жасап.
Басылымға 72 жастағы қала тұрғынының қызы жүгінген.
"Анама алаяқтар қоңырау шалып, өздерін әкімдік қызметкерлері деп таныстырған. Олар анама менің жол апатынан кейін жансақтауға түскенімді хабарлаған. Шұғыл операцияға ақша қажет екенін де айтқан. Олар жарты миллионды бір нөмірге аударуды сұраған, бірақ анамның картасында мұндай ақша болмағандықтан, ол үйден алып кетуді сұраған. Анамның ақшасы болды, оны жерлеу рәсіміне жинап жүрген. Сонымен қатар, ол қолхат жазып, барлық деректі және қанша ақша беретінін көрсеткен. Оған бір қыз келген, анам ақшаны берген. Мұның бәрі 1 сағат ішінде болды. Полицияға жүгінген жоқпыз. Оның қан қысымы бар, денсаулығы үшін қорқамыз. Адамдар қалай алдайтынын бәрі білгенін қалаймыз. Әсіресе, зейнеткерлер", - дейді Лариса есімді тұрғын.
Атырау облысының әкімдігі азаматтардан қырағы болуды және қулыққа берілмеуді сұрайды.
"Мемлекеттік органдар қызметкерлерінің мұндай хабарламаларға, қоңыраулар мен хабарламаларға ешқандай қатысы жоқ екенін ескертеміз және облыс тұрғындарын алаяқтардың айла-амалдарына берілмеуге, қырағы болуға, барлық күдікті жағдай туралы құзыретті органдарға хабарлауға шақырамыз", - делінген әкімдік хабарламасында.
Еске салайық, бұған дейін жалған жарнама жасап, халықты алдаған оралдық алаяқтар ұсталғаны хабарланған еді.
Instagram парақшамызға жазылып, ең қызықты ақпараттарды бірінші болып оқыңыз!