Қарағанды облысында үш күн бұрын із-түзсіз жоғалған екі адам өлі табылды

Қарағанды облысында үш күн бұрын із-түзсіз жоғалған екі адам өлі табылды, - деп хабарлайды Massaget.kz тілшісі.

18 маусымда сағат 21:50-де Абай ауданы Самарқа ауылының маңында 1986 жылы туған әйел адам мен 1987 жылы туған ер адамның жоғалып кеткені туралы хабарлама келіп түскен. Іздестіру-құтқару жұмыстарын жүргізу үшін Қарағанды облысының ТЖД күштері жұмылдырылды.

19 маусымда сағат 15:25-те із-түзсіз жоғалған әйелдің денесі Нұра өзенінен табылды. Жоғалған екінші адамның денесі 20 маусымда сағат 16:05-те іздеу жұмыстары басталған жерден 3,5 шақырым жерде Нұра өзенінен табылды. Өлімнің мән-жайы анықталып жатыр.

ТЖД өкілдері шомылу кезінде өзін-өзі ұстау ережелерін атап өтті: 

• жүзу білмесеңіз, белден жоғары суға түспеңіз;
• балаларды қараусыз қалдырмаңыз;
• мас күйде суға түспеңіз;
• бейтаныс жерлерде суға түспеңіз;
• жағадан алыс жүзбеңіз;
• түнде суға түспеңіз.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!