Әр отбасынан 500 теңгеден: ақтаулықтар жолды өздері салып алған

Ақтауда жаңа үйлердің тұрғындары уәде етілген жолды төрт жыл күткен. Олар ақыры техниканы өздері жалдап, жол салған, - деп хабарлайды Massaget.kz тілшісі "КТК" телеарнасына сілтеме жасап. 

Олардың айтуынша, шенеуніктердің әрекетсіздігінен шаршаған. Жаңбырлы күндері ауладағы аумақ көлге айналады, ал шуақты күндері терезенің сыртында шаңды дауыл тұрады. 

"Әр отбасынан 500 теңгеден жинап, трактор жалдап, жолды тегістедік. Онымен жүру мүлдем мүмкін емес еді. Жаяу жүргіншілерге жол жоқ. Еш жерде тіпті жаяу жүргіншілер жолы да жоқ. Бізде жақсы асфальтқа ақша жоқ. Үйлер салынып жатқанда жолдың бір жылдан кейін бітетінін айтты. Төрт жыл өтті. Барлығы уәде етілген", - дейді тұрғын Роза Ибраимова.

Ашынған тұрғындар төрт жыл бұрын пайдалануға берілген жаңа шағынауданда тұрады. Ауданда құрылыс әлі де жалғасып жатыр. Тұрғындар ол жерден пәтер сатып алғанда сапалы инфрақұрылымға үміттенгеніне шағымданады. Әкімдік бір жылдың ішінде жолдарды асфальттауға уәде берген. Әйтсе де, мәселе сөзден әрекетке көшкен жоқ. Күтуден шаршаған қалалықтар өз күштерімен трассаның шағын бөлігін - 500 метрді тегістеп тастады. Бірақ олар асфальт төсеу тым қымбатқа түседі дейді. Әкімдік бұл аумаққа су құбыры тартылып жатыр, сондықтан бұл жерге әлі асфальт төсеу мүмкін емес деп жауап береді. 

"Кәріз және сумен қамтамасыз ету - басты жұмыс. Олар аяқталған соң асфальт төсеу басталады. Қазір асфальт төсеп, қайта қазып, құбыр төсей бастасақ, дұрыс болмас еді", - деді Ақтау қаласы әкімдігінің құрылыс бөлімінің басшысы Әнуар Туляков.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!