"Мойнымнан ұстап, қылғындырды": Екібастұзда ер адам студентке шабуыл жасаған

Екібастұзда ер адам автобуста ескертуге жауап ретінде колледж студентіне шабуыл жасаған. Полицейлер бұл дерек бойынша тексерісті бастады, - деп хабарлайды Massaget.kz тілшісі Tengrinews.kz-ке сілтеме жасап. 

Оқиға туралы әлеуметтік желілерде зардап шеккен қыздың анасы мәлімдеді. Оның айтуынша, оқиға 31 наурызда таңертең қалалық автобустардың бірінде болған. Оның кәмелетке толмаған қызы группаластарымен бірге колледжге бара жатқан.

Жәбірленуші басылымға бейтаныс адамға итермеуін өтінгеннен кейін ер адам өзіне шабуыл жасағанын айтқан.

"Сағат 07.40-та "Қазақстан" аялдамасына келдік. Автобуста адам толып кетті, мен ортасында есік тұсында тұрдым. Менің қасымда әже мен кішкентай бала болды. Маған шабуыл жасаған адам артта тұрып, бізді қатты итеріп тұрды. Әже оған ұрыса бастады, содан кейін мен оның иығынан түртіп, дұрыстап тұруын өтіндім, ол менің мойнымнан ұстап, қылғындыра бастады. Ол кезде маған ешкім көмектеспеді, бірақ жақын жерде ер адамдар болды. Шығу үшін оның аяғынан тебуге тура келді. Автобустың есігі ашылып, шыққым келгенде, ер адам мені де тепті", - деді 16 жастағы қыз.

Оның айтуынша, аялдамада бейтаныс адам оны қайтадан ұруға тырысқан.

"Жыладым, айғайладым, ол бұрылып, жұдырықпен ұрғысы келді. Бірақ жақын жерде тұрған әйел мұны көріп, көмекке шақырды. Алдымен бір адам жүгірді, содан кейін тағы екеуі жүгірді. Олар шабуылдаушыны ұстап тұрғанда, группаластарым мені колледжге алып кетті. Мен не істерімді білмедім және полиция шақыруды ойламадым. Кейінірек куәгерлерден оның автобусқа жүгіріп, терезені ұрғанын білдік", - деді қыз.

Сол күні жәбірленушінің ата-анасы полицияға жүгінген.

"Қызымның тамағы ауырды. Қатты күйзеліске ұшырағандықтан, ол қазір автобусқа отырудан қорқады", - деді кәмелетке толмаған қыздың анасы.

Екібастұз полициясы бұл дерек тіркелгенін, қазір ол бойынша тексеріс жүргізіліп жатқанын хабарлады.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!