Байқоңырда Украинамен соғысқа қатысқандарға 1,5 миллион теңге берілетіні рас па?

Байқоңырда Украинамен соғысқа қатысқандарға 1,5 миллион теңге берілетіні рас па?
Фото: РИА Новости

Әлеуметтік желілерде Байқоңыр кешені қалалық прокуратурасының атынан, қалада тұратын жұмылдырылған азаматтарға, сондай-ақ Украинамен соғысқа өз еркімен қатысуға ниет білдіргендерге 260 мың рубль ақшалай төлем жасалғандығы туралы ақпарат тарады. Ақпаратқа ҚР Президентінің "Байқоңыр" кешеніндегі арнайы өкілінің қызметін қамтамасыз ету басқармасында түсініктеме берілді, - деп хабарлайды Massaget.kz тілшісі Stopfake.kz сайтына сілтеме жасап. 

Байқоңыр арнайы өкілдігінің Facebook-тегі ресми парақшасында жарияланған ақпаратқа сәйкес, мобилизациялау және төлемдер туралы ақпарат Байқоңыр аумағында орналасқан Ресей Федерациясының азаматтарына ғана қатысты.

"Байқоңыр қаласы Әкімшілігі басшысының 2023 жылғы 7 ақпандағы №49 қаулысына сәйкес Байқоңыр қаласында тұратын жұмылдырылған азаматтарға, сондай-ақ арнайы әскери операцияға қатысуға ниет білдірген және әскери қызметті өткеруге келісімшарт жасасқан адамдарға әлеуметтік қолдау шарасы ретінде 260 мың рубль (шамамен 1 586 000 теңге) мөлшерінде біржолғы ақшалай төлем белгіленген. Ресей Федерациясы Президентінің 21.09.2022 жылғы №647 "Ресей Федерациясында ішінара жұмылдыру жариялау туралы" Жарлығына сәйкес тек Ресей Федерациясының азаматтары әскери қызметке шақырылады", - делінген хабарламада.

Сондай-ақ, ерікті түрде әскери қызметші ретінде жұмылдыру немесе арнайы әскери операцияға қатысу үшін Ресей Федерациясының 60 жасқа дейінгі ер азаматтары шақырылуы мүмкін.

"Осылайша, Байқоңыр қаласы Әкімшілігі басшысының жоғарыда аталған Қаулысына сәйкес әлеуметтік қолдау шарасы ретінде 260 (екі жүз алпыс) мың рубль мөлшерінде біржолғы ақшалай төлем тек Байқоңыр қаласының тұрғыны Ресей Федерациясының азаматтарына қолданылады. Анықтама ретінде, үкіметаралық келісімге сәйкес Байқоңыр қаласының тұрғыны болып қала аумағында тұратын және Байқоңыр қаласының Әкімшілігінде тіркелген Қазақстан Республикасының азаматы немесе Ресей Федерациясының азаматы танылады", - делінген хабарламада.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!

С. Сатыбалдина