Днепрде қазақстандық және украиналық киберполицейлер 32 алаяқты ұстады

Қазақстандық және украиналық киберполиция қызметкерлері алаяқтардың Call-орталығын жойды. ІІМ-де арнайы операция жайында айтылды, – деп хабарлайды Polisia.kz.

"Желтоқсан аяғында Қазақстан Республикасы ІІМ Киберқылмысқа қарсы күрес орталығының қызметкерлері және Украина Ұлттық полициясындағы әріптестерімен бірлескен жедел іс-шараларды өткізу кезінде Днепрдегі алаяқтардың Сall-орталығының қызметін тоқтатты. Қазақстан азаматтарына қатысты интернет-алаяқтықпен айналысатын трансұлттық қылмыстық топтың ұйымдастырушылары мен мүшелері анықталды. Олар Қазақстан азаматтарына телефон соғып, өздерін банктердің, құқық қорғау органдарының қызметкерлері ретінде таныстырып, күдікті транзакциялар туралы хабарлап, белгісіз тұлғалар олардың есепшоттарына қол жеткізді деп және транзакцияларды тоқтатамыз деген желеумен клиенттерді қаржы мәліметтерін беруге көндірген, онлайн-несиелер алдырған. Мұндай ақпаратты алған шабуылшылар жәбірленушілердің ақшасын қылмыскерлердің бақылауындағы есепшоттарға аударған. Қылмыстық топты ұйымдастырушылар алаяқ байланыс орталығының операторларын ынталандырып, қылмыстық жолмен қол жеткізген сомаға өсімақы төлеп отырған", - деді ҚР ІІМ Криминалдық полиция департаменті Киберқылмысқа қарсы күрес орталығының бастығы Жандос Сүйінбай.

Оның айтуынша, қылмыскерлер банк шоттарды, сондай-ақ, оффшорлық шоттар мен криптовалюта әмияндарын пайдаланған. Олар арқылы алаяқтық құрбандарынан ұрланған ақшаны белгілі бір пайызға қолма-қол ақшаға айналдырып отырған.

"Бұл ретте Украина тарапы күдіктілердің Днепропетровск облысындағы 13 тұрғылықты мекенжайында тінту жүргізді. Жедел-іздестіру шаралары барысында 45 дана компьютерлік техника, 24 ұялы телефон, sim-карта және басқа да заттай айғақтар тәркіленді. Тәркіленген компьютерлерде қоңырау шалу кезінде абонент нөмірлерді ауыстыруға арналған бағдарламалық жасақтама бар екені анықталды. Осы бағдарламалардың журнал файлдарын қарау кезінде қазақстандық операторлардың абоненттерінің нөмірлеріне алаяқ қоңыраулар тарихы анықталды. Сондай-ақ, тәркіленген техниканы тексеру барысында Қазақстан Республикасы азаматтарының жеке деректері және Қазақстан Республикасы Ұлттық Банкінің эмблемасы бар дереккөзі табылды. Бұл ақпаратты алаяқтар өздерінің шоттарынан ақша жымқыру үшін форд-қоңырау шалу үшін пайдаланған", - деп хабарлады спикер.

Арнайы операция барысында қылмыстық топтың Украина азаматтары арасынан шыққан 32 мүшесі ұсталды. Call-орталығы 40 адамнан тұрады.

Қазір Украина тарапы қазақстандық киберполицияның көмегі арқылы тергеу әрекеттері мен жедел-іздестіру іс-шараларын жүргізіп жатыр. Олар құқыққа қайшы қызметтің барлық мән-жайын, қосымша эпизодтарын, ықтимал қатысушыларын анықтауға, сондай-ақ, осы қылмыстық топтың Қазақстан азаматтарына келтірген залалын анықтауға бағытталған.

Еске салайық, ІІМ Киберқылмысқа қарсы күрес орталығы ағымдағы жылы Қазақстан аумағында қазақстандықтар мен шетел азаматтарынан - алаяқтар мен дроп-үйлестірушілерінен бірқатар қылмыстық топтардың қызметін тоқтатқан. Осы деректер бойынша кінәлі адамдарды жауапқа тарту мақсатында тергеу жүргізіліп жатыр.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!