Президент Қасым-Жомарт Тоқаев Павлодар өңірінде туған қазақ ғұламаларын айтты, - деп хабарлайды Massaget.kz тілшісі.
"Абылайдың ақылшысы Бұхар жырау, ғұлама ойшыл Мәшһүр Жүсіп, Алаш ардақтысы Жүсіпбек Аймауытов осында дүниеге келген. Жаяу Мұса, Естай ақын, Сұлтанмахмұт Торайғыров, Шәкен Айманов сынды руханият саласының айтулы өкілдері осы өңірден шыққан. Қаныш Сәтбаев, Әлкей Марғұлан, Ермұхан Бекмаханов, Кемел Ақышев, Шапық Шөкин сияқты әйгілі ғалымдар - Ертіс бойының перзенттері. Бір сөзбен айтсақ, Баянауыл баурайы - тектілердің берекелі бесігі.
Павлодар облысында "Қуатты өңірлер - қуатты ел" қағидаты айқын көрініс тапқан. Бұл аймақты экономикамыздың энергетикалық жүрегі деуге болады. Еліміздегі электр қуатының 40 пайыздан астамы осында өндіріледі. Қазақстанда шығарылатын көмірдің де жартысынан астамы Павлодардың еншісінде. Облыстың әрбір бесінші тұрғыны өңдеу өнеркәсібінде немесе отын-энергетика кешенінде жұмыс істейді.
Еліміздегі мұнай-химия өнімдерінің үштен бірі, ферроқорытпалардың жартысынан көбі осы өңірде шығады. Сондай-ақ, бұл өлке өңдеу өнеркәсібінің және шикізаттық емес экспорттың көлемі бойынша алдыңғы орында тұр", - деді Президент.
Еске салайық, бүгін Мемлекет басшысы Қасым-Жомарт Тоқаевтың Павлодар облысы жұртшылығымен кездесуі өтіп жатыр. Кездесу барысында Президент жергілікті шенеуніктерге түрлі мәселе бойынша тапсырма беріп жатыр.
Одан бөлек, бүгін Тоқаев Қарағанды облысының жұртшылығымен кездескен болатын.
Тоқаев Қарағанды облысына сапарында қандай маңызды тапсырмалар берді?
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!