"Құлатып, қылғындыра бастаған". Әкім орынбасары 13 жастағы қызды зорлықтан аман алып қалды

Түркістан облысында тұрғын 13 жастағы қызды зорламақ болған ер адамды ұстап, полицейлерге тапсырды, - деп хабарлайды Massaget.kz Түркістан облысы ПД баспасөз қызметіне сілтеме жасап.

Оқиға Сарыағаш ауданы Дарбаза ауылында түнде болған.  

"Жасөспірім қыз отбасымен бірге кешкі серуенге шыққан. Содан қайтар сәтте, қыз үйіне ертерек бармақ болып, ата-анасынан бұрын кетіп қалады. Осы сәтте жалғыз үйіне қайтып бара жатқан жасөспірімнің соңынан аяқасты белгісіз ер адам еріп, шашынан тартып, шетке қарай алып шыққан. Сонымен қатар, бетінен шапалақпен ұрып, жерге құлатады. Қыз бірден айғайға басады. Ал күдікті оның аузын жауып, қылқындырған", - делінген хабарламада.

ПД мәліметінше, осы кезде екі адамның арпалысып жатқанын сол маңнан әйелімен бірге өтіп бара жатқан тұрғын байқап, бірден көмекке ұмтылған. Қызға көмектескен Дарбаза ауылы әкімінің орынбасары Сүйіндік Сейітжаппарұлы болып шықты.

"Кешкісін жұбайым екеуміз кетіп бара жатқанда, көшеден екі адам ұрысып-төбелесіп жатқандай, біріне көмек қажеттей көрінді. Бірден оқиға болып жатқан жаққа жүгірдім, алайда күдікті мені көрді де қашуға әрекеттенді. Бірақ оның қызға тиіспекші болғанын білгеннен кейін, ештеңеге қарамай соңынан қудым. 100 метрдей қуып отырып, ақыры ұстадым. Полиция шақырып, оны тапсырдық. Бұл менің азаматтық борышым деп білдім. Ең бастысы қыздың жағдайы жақсы. Оған ештеңе болмады" - деді ол.

Оқиға орнына полицейлер барып, мән-жайды анықтаған.

"Қазір күдікті қамауда. Оған қатысты соталды тергеу амалдары жүргізіліп жатыр. Оған қатысты ҚР Қылмыстық кодексінің 120-бабы 4-бөлігі "Зорлау", 24-бабы 3-бөлігі "Қылмысқа дайындалу және оқталу" бойынша соталды тергеу амалдары жүргізіліп жатыр. Оқиғаның толық мән-жайы тергеу барысында анықталады", - делінген ПД хабарламасында.

Сілтемесіз жаңалық оқисыз ба? Онда Telegram желісінде парақшамызға тіркеліңіз!