Қарағанды облысындағы бірнеше су қойманың суы мен топырағынан дөңгелек құрт пен лямблия жұмыртқалары табылды, - деп хабарлайды Massaget.kz тілшісі.
Су мен топырақтағы паразиттерді аумақтық санитарлық-эпидемиологиялық бақылау басқармаларының қызметкерлері анықтады. Мамандар жыл сайын шомылу маусымы басталғанға дейін және кезінде ашық су қоймаларынан және жағалау аймақтарынан сынама алады.
"Сараптама нәтижелері бойынша мамыр мен маусым айының басында Орталық саябақтың үлкен көлінде лямблия кисталары табылды. Федоров су қоймасының қалалық жағажайынан және Нұра өзенінен Қызылжар ауылы, сондай-ақ Федоров су қоймасының, парктің үлкен көлінің және Ростовка ауылының Нұра өзенінің рекреациялық аймақтарының топырағынан дөңгелек құрт жұмыртқалары табылды. Маусым айында аталған су айдындарында зертханалық бақылау күшейтілді. Соңғы сараптама нәтижелері паразитологиялық көрсеткіштер бойынша сәйкессіздік Қарағанды орталық паркінің үлкен көлінде ғана анықталды. Онда шомылуға тыйым салу туралы белгілер орнатылды", - деді Қарағанды облысы санитарлық-эпидемиологиялық бақылау департаменті басшысының орынбасары Әйгерім Жылқыбаева.
Паразиттер су тасқыны кезінде еріген қар суы су қоймаларына көп мөлшерде түскен кезде пайда болған болуы мүмкін. Маман департамент қызметкерлері қыркүйекке дейін Қарағанды орталық саябағының үлкен көлінде су мен топырақ мониторингін күшейтетінін айтты.
Қарағанды облысының ТЖД қаланың орталық саябағының үлкен көлінде ғана емес, Нұра өзенінің бойында да шомылуға тыйым салынғанын еске салды, өйткені ол шомылуға рұқсат етілген орындар тізімінде жоқ.
Тағы да оқи отырыңыздар: Қазақта қанша хан болған?
Өзекті жаңалықтарды өз уақытында оқу үшін Facebook парақшамызға жазылыңыз!