Алматының қай көшелерінде жөндеу жұмыстары басталды?

Алматы әкімдігі қай көшеде орташа жөндеу жұмыстары басталғанын айтты, - деп хабарлайды Massaget.kz тілшісі.

Алматыда биыл ұзындығы 250 шақырым болатын 274 көше орташа жөндеуден өтеді, осылайша 92 пайызға дейін жолдың үлесін жақсы және қанағаттанарлық жағдайда жеткізу жоспарланған.

Қалалық мобилділік басқармасының хабарлауынша, жұмыс барлық ауданда басталған. Бұл ретте, 20 магистральдық көшені жөндеу 25 тамызға дейін, ал аудандық көшелерді қазан айының соңына дейін аяқтау көзделген.

"Қазір қозғалысты шектеуді қажет етпейтін жұмыстар жүргізілуде. Бұл тротуар төсеу, түнде асфальт жабынын қыру жұмыстары. Полимерасфальтбетонды төселген соң технология бойынша 36 сағат тұру керек, сондықтан жол ішінара жабылады", - деді басқарма басшысының орынбасары Ернұр Әбжахан.

Сонымен, Дулати даңғылында әл-Фараби даңғылынан Набережная көшесіне дейін, Жандосов көшесінде Тимирязев көшесінен Манас көшесіне дейін, Өтегенов көшесінде Қ.Тауасарұлы көшесінен К.Салықов көшесіне дейін, Березовский көшесінде Гагарин даңғылынан Розыбакиев көшесіне дейін, Қабдолов көшесінде Өтеген батыр көшесінен Саин даңғылына дейін, Тұрғұт Өзал көшесінде Төле би көшесінен Райымбек даңғылына дейін, Сүйінбай даңғылында Бекмаханов көшесінен Лавренев көшесіне дейін және т.б. жұмыс басталды.

Жөнделетін көшелердің аумағында мердігерлік ұйым басшыларының байланыс ақпараты бар арнайы стендтер орнатылады. Көлік қозғалысын шектеу қала тұрғындарына БАҚ және әлеуметтік желілер арқылы хабарланады, сондай-ақ жөнделетін учаскелер «2Гис» және "Яндекс карты" сервистерінде көрсетіледі.

Қызықты жаңалықтар мен видеоларды көру үшін TikTok арнамызға жазылыңыз!