Ақтөбе қаласы прокуратурасы балалар пансионаттары түріндегі қайырымдылық мекемелерін тексеру барысында қолданыстағы заңнама талаптарының бұзылғанын анықтады, - деп хабарлайды Massaget.kz тілшісі облыстық прокуратураға сілтеме жасап.
"Мәселен, Ақтөбе қаласындағы "Актөбе" және "Ақжар" пансионаттарының тәрбиеленушілерінің жеке істерін зерделеу барысында, тәрбиеленушілердің діни әдебиеттерді пайдаланғаны, сонымен қатар, жеке істерінде діни жазбалары бар дәптерлердің бар екені анықталды. Іс жүзінде мекемелердің қызметі олардың жарғылық мақсаттарына қайшы келеді", - делінген хабарламада.
Қайырымдылық мекемелері қызметінің діни бейімділігі, балалар мен тәрбиешілердің сауалнамаларымен де расталды. Сонымен қатар, обьектілерде санитарлық-эпидемиологиялық, өрт, еңбек заңнамасының талаптары бұзылған.
"Аталған мекемелер өз қызметін санитарлық-эпидемиологиялық қорытындыларсыз жүзеге асырған. Балалардың тиісті білім алуға, тәрбиеленуге және дер кезінде медициналық көмек алуға құқықтары мен бостандықтары айтарлықтай бұзылған", -делінген хабарламада.
Қазіргі уақытта сот Ақтөбе қаласы прокуратурасының талап-арызы бойынша 2 пансионатты "Актөбе" және "Ақжар" тіркеуден айырып, таратты.
Қызықты жаңалықтар мен видеоларды көру үшін TikTok арнамызға жазылыңыз!