Қасым-Жомарт Тоқаев пен Юн Сок Ель екі ел өнерпаздарының гала-концертін тамашалады, - деп хабарлайды Massaget.kz тілшісі.
Шараға дейін мемлекеттер басшылары Қалибек Қуанышбаев атындағы Мемлекеттік академиялық қазақ музыкалық драма театрының фойесіне қойылған "Ұлы дала алтыны" көрмесін аралап көрді.
Көрмеге алтыннан жасалған археологиялық тарихи жәдігерлер, соның ішінде басты экспонат ретінде Есік қорғанынан табылған "Алтын адамның" реконструкцияланған киімі мен қару-жарағы қойылған.
Екі ел президенттері Қазақстан мен Кореяның танымал мәдениет қайраткерлерінің, өнер ұжымдарының концертін тамашалады.
Бағдарлама аясында шетел композиторларының туындылары, әлемге әйгілі опералардан үзінділер орындалды.
Сонымен қатар бірнеше хореографиялық композиция ұсынылды. Концертте жеке орындаушылармен қатар, "Астана опера" мемлекеттік опера және балет театры мен Мемлекеттік республикалық корей музыкалық комедия театрының әртістері, "Бірлік", Korean Culture Leaders ансамбльдері өнер көрсетті.
Кешті Корея ресми делегациясының өкілдері және еліміздегі этномәдени бірлестіктердің мүшелері де тамашалады.
Қызықты жаңалықтар мен видеоларды көру үшін TikTok арнамызға жазылыңыз!