Астаналық жігіт зейнеткердің телефонындағы бар ақшасын өзіне аударып алған

Астана полициясы зейнеткердің телефонын алып, шотындағы барлық жиған-тергенін жымқырған ер адамды ұстады, - деп хабарлайды Massaget.kz тілшісі Polisia.kz сайтына сілтеме жасап.

Полицияға 71 жастағы қала тұрғыны арыз беріп, бейтаныс біреу оның құны 100 мың теңге тұратын Samsung телефонын тартып алғанын айтқан. Ер адам жәбірленушінің қасына келіп отырған.

Зейнеткермен сөйлескеннен кейін ол қолындағы ұялы телефонын жұлып алып, ізін суытқан. Кейін қаскүнем мобильді банкинг арқылы жәбірленушінің банктік шотынан 475 мың теңге көлеміндегі қаражатты иемденген.

Жедел-іздестіру іс-шаралары барысында Байқоңыр аудандық ПБ криминалдық полиция бөлімінің қызметкерлері қарақшылық шабуылмен айналысқан 31 жастағы Павлодар облысының тұрғынын ұстаған.

Бұл дерек бойынша ҚР Қылмыстық кодексінің 191-бабы (Тонау) бойынша сотқа дейінгі тергеу амалдары жүргізіледі. Шабуыл жасаған адам ПД уақытша ұстау изоляторына жеткізілді. Астана қаласы полиция департаменті азаматтарды қырағы болуды ескертеді. Сізге қарсы заңсыз әрекеттер жасалса, дереу полицияға қоңырау шалуға кеңес береді.

Өзекті жаңалықтарды өз уақытында оқу үшін Facebook парақшамызға жазылыңыз!