Екібастұзда бала кәріз құдығына құлап кетті. Vita еріктілерінің айтуынша, түстен кейін шамамен сағат үште 2-сынып оқушысы жоғалып кеткені туралы хабарлама түскен. Ол шамамен сағат 12.40-та үйден шыққан, алайда мектепке жете алмаған, - деп хабарлайды Massaget.kz тілшісі. pavlodarnews.kz-ке сілтеме жасап.
"Мұғалім бірден дабыл қағып, іздей бастаған. Сағат 15:20-да еріктілер аулаларды тексеріп, камераларды қараған, адамдардан сұрастырған. Сағат 16:00 шамасында еріктілер қуанышты хабар жеткізді", - деді ұйым.
Ол мектепке барар жолда ашық құдыққа құлап, бірнеше сағат бойы шыға алмай айқайлаған, алайда оны ешкім естімеген. Құдықтың тереңдігі – шамамен екі метр.
"Бірнеше сағат бойы қарда тізерлеп отырған бала не істеу керектігін білмеген. Телефоны болмаған, себебі отбасы көпбалалы. Ол адамдардың назарын өзіне аударуға тырысып, құдықтан рюкзагын лақтырған. Оны сабаққа барған мектеп оқушылары көріп қалып, баланы шығарып алған", - дейді еріктілер.
Облыстық денсаулық сақтау басқармасының мәліметінше, үйден шақырту түскен. Баланың миы шайқалуы мүмкін және тоңып қалған.
Қызықты жаңалықтар мен видеоларды көру үшін TikTok арнамызға жазылыңыз!