Журналистика саласы үшін тұңғыш "Үркер" сыйлығы жарияланды

Журналистика саласы үшін тұңғыш "Үркер" сыйлығы жарияланды
Фото: epicinfotec.com

ҚР Ақпарат және коммуникациялар министрі Дәурен Абаев журналистика саласында тағы бір сыйлықтың тағайындалғанын хабарлады.

"Құрметті достар! Биылғы жылы отандық телевизияның үздіктері "Тұмар" сыйлығымен марапатталғаны белгілі. Осы орайда біз басқа БАҚ өкілдерінің еңбегін де ескергенді жөн көрдік. Сонымен, баспа, радио- және интернет журналистика саласына арналған тұңғыш ұлттық "Үркер" сыйлығын жариялаймыз",- деді министр өзінің фейсбук парақшасында.

Жобаның мақсаты – талантты журналистер мен сапалы медиа-жобаларға қолдау көрсету. Байқаудың қазылар алқасы осы саланың майталмандары мен қоғам қайраткерлерінен және сарапшылардан құралады. Қазылардың толық тізімі алдын ала жарияланады.

"Сыйлық 15 аталым бойынша беріледі. Журналистиканың дәстүрлі салаларымен қатар, "үздік фотосурет", "Қазақстан туралы ең үздік танымдық материал" және "Қазнеттегі медиа серпіліс" сияқты бағыттар қамтылады.

Байқауға өтініш 7 мамырдан бастап el.kz сайтында қабылданады, сыйлыққа қатысты егжей-тегжейлі ақпарат та сонда болмақ. Салтанатты марапаттау журналистердің кәсіби мерекесі қарсаңында ұйымдастырылады", - дейді министр.

Ж. Жұмағұлов